Basura Watch gilusad sa DPS
CEBU, Philippines — Gipaabot nga daghan na usab basura ang makolekta atol ug human sa Sinulog Grand Parade sumala pa sa Department of Public Services sa dakbayan sa Sugbo.
Tungod niini ang Cebu City Environment and Natural Resources (CCENRO) pinaagi sa Solid Waste Management Board mihimo sa gitawag nga Sinulog 2018 Basura Watch.
Magpatabang sila sa mga institusyon, publiko ug mga environmental groups aron edukahon ang publiko sa hustong paghipos sa basura.
Usa kini ka programa nga nagtinguha nga mogamay ang volume sa basura sa maong adlaw ug sa mosunod nga mga katuigan.
Adunay 36 ka eco-stations nga kompleto sa kagamitan sa tent, garbage receptacles nga butangan og label kon unsa nga basura ang angay ilabay. Ibutang kini sa Sinulog Grand Parade route ug diha mismo sa Basilica Minore Del Sto. Niño, Plaza Independencia, ug sa Devotee City.
Samtang 221 ka Barangay Environmental Officers (BEOs) ug mga volunteers ipakatap aron manakop niadtong magpataka paglabay og basura.
Adunay multang P500 ang madakpan ug ang dili mobayad mopaubos og community service sulod sa 30 minutos.
Sa laing bahin, karong adlaw’ng Biyernes, Enero 19 buksan sa siyudad sa Sugbo ang Devotee City nga mamahimong puy-anan sa mga deboto gikan sa probinsya nga tuyong moanhi nunot sa kapistahan ug Sinulog Grand Parade. Usa ka gatos ka mga container vans ang himuong pinuy-anan sa mga deboto nga ipahimutang sa Compania Maritima. (BANAT NEWS)
- Latest