Duha ka wanted sa Compostela nasikop
Ang top 3 most wanted sa kasong carnapping giila nga si Leo Badal, 38, residente sa Barangay Cambayog, Compostela samtang ang usa ka Ricky Sotto, 28, residente gihapon sa maong lugar ang top 4 most wanted sa lungsod sa kasong pagpanglugos. File
CEBU, Philippines — Nadakpan pinasikad sa warrant of arrest ang top 3 ug top 4 sa most wanted persons sa Lungsod sa Compostela kinsa pito ka tuig na nga nagtagotago sa Purok 2, San Jose, Dakbayan sa Sugbo niadtong Miyerkules
Ang top 3 most wanted sa kasong carnapping giila nga si Leo Badal, 38, residente sa Barangay Cambayog, Compostela samtang ang usa ka Ricky Sotto, 28, residente gihapon sa maong lugar ang top 4 most wanted sa lungsod sa kasong pagpanglugos.
Ang hepe sa Compostela Police Station nga si Senior Insp. Junafe Vergara nibutyag nga si Badal ang gitumbok nga nagpaluyo sa tanang carnapping sa ilang lungsod niadtong nakalabay’ng tulo hangtud upat ka adlaw.
Samtang si Sotto nanglugos pito na ka tuig ang nakalabay apan matud ni Vergara nga dugay na kaayo nilang gipangita tungod sa kaidlas niini.
Niadtong nakalabay’ng adlaw, nakadawat sila og intelligence report nga anaa ra nanago ang duha sa Barangay San Jose, Dakbayan sa Sugbo.
"Di daw na sila permanente nga naa diha. Magbalhin-balhin daw na," matud ni Vergara.
Nakig-alayon sila sa Talamban Police Station nga maoy nagsakop sa maong barangay hinungdan sa pagkasikop sa duha.
Matud sa kapolisan nga karong naibanan na ang top most wanted sa ilang lungsod, hayan pun-an pa kini og mga kriminal nga aduna pay nagpatong nga kaso. (BANAT NEWS)
- Latest
