Faith-based tourism naa na sa Sugbo
CEBU, Philippines — Gihangop sa Probinsya sa Sugbo ang pamahayag sa Department of Tourism nga motutok kini sa faith-based tourism karong tuiga.
Matud ni Bise Gobernador Agnes Magpale, chairperson sa Provincial Tourism Council, nga ang Sugbo ilado na daan tungod sa kultura ug heritage sites niini ug ang tinguha sa DOT makatabang kini sa faith-based tourism.
“Now we are expecting nga ang atong faith-based tourism molambo because ang atong national government is taking cognizance,” matud ni Magpale.
Si Magpale nagkanayon nga ang mga heritage sites sama sa simbahan sa habagatang bahin ug kalihukan sa Isla sa Bantayan atol sa Semana Santa maoy ehemplo sa faith-based tourism nga gihimo na sa probinsiya.
Gihatagan usab og bili ang karaang estruktura sa Lungsod sa Argao nga natabunan kaniadto sa edipisyo sa Isidro Kintanar Memorial District Hospital.
Apan tungod sa faith-based tourism, gipademolis ang out-patient building sa tambalanan aron makita ang karaang estruktura nga wala magamit kaniadto apan karon gitawag na kini nga Kapilya delos Inocentis o Chaplet of the Unborn.
Pinaagi sa tabang sa nasudnong kagamhanan, igo na lang palambuon ang culture and heritage sites pinaagi sa paghatag og hinabang alang sa estruktura. Matud sa bise gobernador nga usa sa mga heritage structures nga gitinguha nga mapalambo ang San Pedro Calungsod Shrine sa Lungsod sa Ginatilan. (BANAT NEWS)
- Latest
