BMO nag-solicit para sa Sinulog?

CEBU, Philippines — Naalarma si Apas Barangay Captain Ramil Ayuman sa giingong “irregular” solicitation nga gihimo sa mga sakop sa Barangay Mayor’s Office (BMO) sa ilang barangay ngadto sa mga business establishments aron gamiton sa umaabot nga Sinulog sa Barangay. Sigon ni Ayuman, niadtong miaging adlaw duha ka tag-iya sa business establishments ang miadto sa ilang barangay ug nagdala og business permit aron ipakita nga sila mituman sa mga rekisitos.

Didto niya nasayran nga giadto og “taga Barangay Apas” ang maong mga establisamento ug gihatagan og solicitation ug giingnan nga wala sila’y business permit.

Si Ayuman mipasabot kanila nga wala sila nag-tax mapping ug wala usab sila nag-solicit og kwarta alang sa Sinulog. Matud pa ni Ayuman sa iyang pagsusi ang BMO maoy nihimo niini. Giklaro ni Ayuman  miaksiyon siya tungod sa mga reklamo ug iyaha kining gi-post sa Facebook aron pagpahibawo nga dili kini gikan sa barangay.

“Wala man nay problem mo sponsor ‘ta, the question is gigamit nimo ang seal sa City Government imong gi-deceive ang mga establishment niya inyo pa gyud gihulga wa man ‘tay ingon nga gusto nato mayabo ang ilang Sinulog kay kita ganahan sad. Mo-ampo sad ta modaog ang Apas kay of course that’s representing Barangy Apas,” pasabot ni Ayuman.

Matud pa nga gikan sa P100 mil hangtud P1 Milyon ang gipangayo diha sa solicitation. Si Ayuman mipasidaan sa mga negosyante nga dili konektado sa gobiyerno ang BMO.

Gusto ni Ayuman padad-an og suwat si Mayor Tomas Osmeña aron isumbong ang gihimo sa iyang mga sakop.

Sa iyang bahin, si Rey Suelto, pangulo sa Apas contingent miingon nga wala siya masayod nga dili diay pwede ang paggamit sa selyo sa dakbayan. Matud niya inisyatiba niya kining pag-solicit ug wala masayod ang pangulo sa BMO sa iyang gibuhat.

Kini midugang nga ang P300,000 nga subsidy sa Sinulog Foundation Incorporated dili paigo aron pag-finance sa ilang presentation.

Enero 8, adlaw’ng Lunes nihunong na sila sa pagpanghatag og solicitation letter. Wa pay taga BMO sa Apas ang mihatag og pamahayag bahin niini. Apan ang mga konsehal sa Barug Team Rama miingon ang paggamit sa seal sa city hall kalapasan sa Republic Act 6713 kon Code of Conduct and Ethical Standard for Public Officials and Employees.

Giingong ang solicitation makonsiderar nga ilegal kon walay pagtugot sa gobiyerno. (BANAT NEWS)