Asa na ang uniform?

CEBU, Philippines — Hapit na lang mahuman ang klase apan hangtud karon wala pa gyud mapusli ang uniporme  sa mga estudyanteng mag on the job training nga nagtungha sa Talisay City College (TCC).

Ang mga reklamante nga hadlok magpaila tungod kay dumtan ang nipadayag sa mga tigbalita nga gikolektahan sila og tag P2 mil sa ilang administrador para sa ilang uniporme matag tinun-an nga graduating. Apan pila na lang ka buwan matapos na ang tingklase wala pa gyud nila igkita ang ilang gihandum nga uniporme.

Matud pa daghang alibi ang mga tinugyanan sa TCC labot sa ilang uniporme. Usa sa ilang alibi mao nga gitarong gyud daw pagtahi mao na nga nadugay.

Pero ilang nasayran nga ang tinuod nga rason mao ang pagdaginot nila sa tela tungod kay aduna’y pipila nga nahatagan og uniporme apan dili mao sa desinyo nga ilang gisabotan.

Ang tinubdan miingon nga wala gyud sila paminawa kay kun mamugos gyud hayan dili daw i-release ang mga files sa eskuylahan ingon man dili pirmahan ang clearances. Sa nakuhang impormasyon sa mga tigbalita nasuta nga naproblema gyud ang kadagkuan sa TCC sa maong uniporme. Si Ritchel Bacaltos, presidente sa TCC nibutyag nga nangayo na sila og pasaylo sa mga tinun-an gumikan sa hitabo.  Iyang gipasabot nga ang P2 mil nga gibayad sa mga tinun-an duha na kana ka set nga uniporme.

Iyang giklaro nga nahuman na ang ubang mga uniporme apan ang uban wala pa.  Iyang giangkon nga nagproblema gyud sila tungod kay nagpasukod ang mga tinun-an nga walay bayad. Gani P5 mil ra man ang ilang nakolekta sa dihang nitapos na lang ang buwan sa Oktubre hinungdan nga sila nakatapal na sab niini.

Apan iyang gihimakak bati o dili maayo ang panapton sa uniporme. Dugang pa niya nga naleksyon na siya niini busa sa sunod dili na sila magpatahi og laing uniporme para sa mag OJT aron dili na mahasol. (IBM)(BANATNEWS)