Call center agent gitulis

CEBU, Philippines — Usa ka babayeng call center agent gitulis sa duha ka lalaking nagsakay og motorsiklo didto sa Isla Verde, Barangay San Isidro, dakbayan sa Talisay kagahapon sa kaadlawon.

Ang biktima nga si Wilrose Viernes, 35, dalaga nga nagpuyo sa nahisgutang lugar wala makasukol kay kalit siyang gitionan og kutsilyo sa mga tulisan.

Matud ni PO2 Raymond Lleve sa Talisay City Police Station nga paingon na unta nga motrabaho ang biktima nga naglakaw sa karsada  diha nga gibabagan siya sa duha ka lalaking nagsakay og motorsiklo.

Nagkurog sa kalisang ang biktima diha nga gitionan siya’g kutsilyo ug wala makasanta diha nga ang mga tulisan miilog sa iyang bag nga adunay sulod nga cellphone, mga ID, kuwarta ug uban pa nga butang.

Si Viernes maoy labing ulahing biktima sa pagpanulis sa mga tulisan nga magsakay og motorsiklo. Niadtong miaging buwan, dul-an sa 10 ang nabiktima sa susamang modus sa pagpanulis.

Matud sa kapolisan nga mogara ang mga tulisan kay kon duna sila’y madakpan nga suspek, ang mga biktima dili na man mopasaka og kaso batok kanila, ilabi na kon mabawi ang mga butang kinawat.

Naghangyo ang mga polis sa mga mabiktima sa pagpanulis nga pasakaan gyud nila’g kaso kon madakpan nila ang mga tulisan. (RUB) (BANATNEWS)