Mga proyekto sa Mandaue City paspasan paghuman

CEBU, Philippines — Gitinguha ni Mayor Luigi Quisumbing nga madali sa paghuman ang mga nasugdan na nga proyekto sa Mandaue City, sama sa pagtukod sa merkado publiko ug ang pagsulbad sa kanunay’ng paglunop sa unom ka ektaryang relocation site sa Barangay Paknaan.

Mga panimalay sa 200 ka pamilya nga nagpuyo sa pipila ka sitio sa Barangay Paknaan ug Casuntingan gipanglunopan kaniadtong miaging adlaw diha nga mibunok ang uwan tungod sa bagyong Agaton ug miawas ang Butuanon River.

Si Felix Suico Jr., nga pangulo sa City Disaster Risk Rediction and Management Office (CDRRMO) miingon nga ang wala mahuman nga paghimo og riprap sa usa ka bahin sa Butuanon River maoy hinungdan sa pag-awas sa baha.

Matud ni Mayor Quisumbing nga papaspasan niya ang maong proyekto, ug ang paghuman sa P385 milyones nga bag-ong public market sa likud nga bahin sa National Shrine of Saint Joseph sa Barangay Centro.

Pagka karon ang kapin sa 900 ka tindera anaa lang una maninda sa gawas nga bahin sa karaang merkado publiko Sitio Tribunal sa Barangay Centro nga naguba sa linog niadtong 2013.

Si Quisumbing hayan motugot na sa mga tindera nga makabutang sa ilang baligya kon mahuman na ang pagtukod sa Phase 1 sa merkado. Ang konseho sa Mandaue mipagahin og dugang P65 milyones alang sa paghuman sa maong merkado. (BANAT NEWS)