Cebu City hotline 911 sunod tuig

CEBU, Philippines — Sayon na lang unya sa mga residente sa Siyudad sa Sugbo ang pagtawag kun dunay mga emerhensiya o pag-report kun dunay mga panghitabo nga motumaw.

Sunod tuig, ang kagamhanan sa siyudad mobutang na og centralized emergency hotline gamit ang 911.

Gipresentar sa mga opisyal sa PLDT ang device nga gitawag og Smart SOS Dispatch Service sa mga opisyal sa siyudad.

Gipasabot ni Michael Eparwa, Digital Engagement Solutions Expert, nga usa kini ka public safety emergency response system nga nagdagan sa cloud ug interconnected sa 911 DILG system.

Ang mahitabo mao nga kun ang caller motawag sa 911 usa kini ka dispatch system nga makita sa command center ug mahibaw-an kun asa ang mga responders pinaagi sa GPS tracking ug masuta kun pila ka minutos maabot ang responders ngadto sa tawo nga ni-report sa insidente sa 911.

Ang 911 gipatuman na sa ubang lugar sama sa Ilocos, Puerto Princesa, Cavite ug La Union.

Dili mominus sa 45 ka Smart SOS Dispatch Service units ang gamiton sa sistema ug laing 70 ka CCTV cameras ang i-instalar sa siyudad.

Ang kagamhanan sa siyudad mogasto og P15 milyones alang sa operasyon niini sunod tuig sanglit naa naman kini sa 2018 annual budget ubos sa disaster funds.

Ang pangulo sa Cebu City Disaster Risk Reduction and Management Office, Nagiel Bañacia, niingon nga usa sa matabang sa sistema kay sayon na lang sa publiko ang pag-report kun dunay mga panghitabo.

Hinoon limitado kini sa Siyudad sa Sugbo ug kadtong mga report gikan sa ubang lugar ilaha kining ipasa sa hingtungdang lokal nga kagamhanan.

Dili na sab magproblema ang siyudad sa maintenance sa maong proyekto ingon man pag-ayo tungod kay ang provider na ang mohimo niini.

“We need to have a 3C system, command, control and communications, later 4C system, command, control, communication and computer. This one is now getting to 4C, we want to be more advance then you can 4CI, command, control, communication, computer and intelligence and now 5CI which is the command, control, communication, computer, and cyber,” matud ni Mayor Tomas Osmeña. (BANAT NEWS)