Social media gamiton unta sa kaayohan–Msgr. Dosado
CEBU, Philippines — Ang social media angayang gamiton sa maayo pinaagi sa pagpakatap ug pagsangyaw sa maayong balita dili kay gamiton sa pagsabwag sa fake news.
Kini maoy sentro sa homiliya ni Monsignor Jojo Dosado parish priest sa Saint Augustine Parish sa lungsod sa Carmen atol sa ikatulong adlaw sa Misa de Gallo.
Si Dosado naghisgot kini og mensahe ni San Jose ngadto sa anghel pinaagi sa pagsangyaw sa maayong balita apan karon giabusaran sa katawhan ang social media diin unta angayan kining gamiton sa pagsangyaw alang sa mga kaayohan.
Gigamit na hinuon kini karon sa cyber bullying ug pagpakatap og fake news nga makagama og panic sa katawhan.
Awhag ni Dosado nga gamiton ang social media alang sa kalamboan ug ilabi na sa pagsangyaw sa maayong pulong ug mga kaayohan ug dili lang mga kadaut ngadto sa ubang tawo.
Sa laing bahin, wala’y nasinati nga mga insidente sa unang tulo ka adlaw sa Misa de Gallo matud ni Police Regional Office (PRO)-7 director Chief Superintendent Jose Mario Espino.
Giingon nga tungod kini sa pagbutang og mga police assistance desk sa tagsa-tagsa ka mga simbahang katoliko ug pagpadaghan sa police visibility sa maong mga lugar.
Gawas sa mga polis gikan sa mga police station dunay pipila usab ang gikan sa Regional Public Safety Battalion kinsa miabag sa pagbantay pagmentenar sa kahusay ug kalinaw diha sa mga lungsod ug bukirang barangay. (BANAT NEWS)
- Latest