Polis nga makapatay, silotan

CEBU, Philippines — Mga polis nga makapatay atol sa anti-drug operations, ipailawom dayon sa imbestigasyon ug silotan kon ugaling mapamatud-an nga sad-an.

Ang maong pamahayag giluwatan sa direktor sa Police Regional Office-7 nga si Police Chief Supt. Jose Mario Espino.

Niadtong Biyernes, gipulong ni Espino, ang tanang hepe sa kapolisan sa rehiyon, aron hisgotan ang pagplantsa sa subling pagbalik sa Drug Enforcement Unit.

Gibutyag niini nga gihatagan nila og tukmang atensiyon ang pagsiguro nga wala’y polis nga makalapas sa tawhanong katungod ngadto sa mga subject sa ilang operasyon.

Gipanaad sa direktor nga bisan og dili kaayo dugoon ang ilang kampanya batok ilegal nga druga dinhi sa Central Visayas kon ikumpara sa kaulohan, mas paspasan ug mas palawman nila ang imbestigasyon ngadto sa mga polis nga makapatay atol sa operasyon.

“The police officer involved will be directed for investigations. They will explain the circumstances, wherein malalaman kaagad kung sino talaga ang nakapatay na police,” matud ni Espino.

Lakip sa ilang nasabutan nga usa ka oras una pa sugdan ang operasyon sa kapolisan, makig-alayon una sila sa Philippine Drug Enforcement Agency-7, ilabi na kon usa ka High Value Target ang ilang subject.

Nasayran nga subling gibalik ni Presidente Rodrigo Duterte sa unang semana niining buwana ang gahum sa kapolisan sa pakigbatok sa ilegal nga druga human sa duha ka buwan.

Gidid-an ni Duterte ang kapolisan nga moapil sa anti-drug operations gumikan sa sunod-sunod nga kontrobersiya sa maong kampanya. (BANAT NEWS)