State of Calamity na ang Northern Cebu
Ang Provincial Disaster Risk Reduction and Management Office ug Provincial Agriculture Office ang padayon pang nag-consolidate sa danyos sa bagyo ingon man kung pila kabuok ang apektado. Philstar.com/File Photo
CEBU, Philippines — Gipaubos sa state of calamity ang siyam ka lungsod ug usa ka dakbayan sa amihanang bahin sa Probinsiya sa Sugbo human sa bagyong Urduja.
Ang Dakbayan sa Bogo, ug ang mga lungsod sa Tabogon, San Remigio, Sogod, Daanbantayan, Medellin, Borbon, Sta. Fe, Bantayan ug Madridejos ang gideklarar sa Provincial Board nga state of calamity pinaagi sa resolusyon ni Bokal Celestiono “Tining” Martinez III nga gipasar kagahapon atol sa sesyon nga maoy katapusan alang niining tuiga.
Ang Provincial Disaster Risk Reduction and Management Office ug Provincial Agriculture Office ang padayon pang nag-consolidate sa danyos sa bagyo ingon man kung pila kabuok ang apektado.
Bisan apektado sab ang Sugbo sa maong bagyo, si Gobernador Hilario Davide III nipahibawo nga andam mohatag og hinabang ang probinsiya ngadto sa Biliran.
Si Cebu City Mayor Tomas Osmeña sa iyang bahin nagkanayon nga ang kagamhanan sa siyudad dili na mohatag og hinabang sa Biliran.
Matud niya nga ang nasudnong kagamhanan ang makatabang sa mga lugar nga apektado sa bagyo ilabi na sa problema sa tubig sanglit mahal ang pag-ship niini gikan sa siyudad paingon sa Biliran.
Iyang gipasabot nga hinapos na ang tuig ug ang siyudad wala sa posisyon aron i-mobilize ang resources.
Samtang sa mga bukirang barangay sa siyudad, ang mayor niingon nga mangayo siya sa City Agriculture Department sa assessment labot sa mga naapektuhan nga mga pananom ug uban pa aron basehan sa paghatag og hinabang. (BANAT NEWS)
- Latest
