Paghatag og P50 mil sa kapolisan ipadayon

CEBU, Philippines — Dili makapugong ang pagbabag sa oposisyon sa plano ni Cebu City Mayor Tomas Osmeña nga mohatag og P50 mil sa polis nga makapatay og kriminal niining padayong gubat batok sa gidiling drugas. “May kiha o wala, duna man gyu’y gastuhan. Gusto ko nga ang kapolisan makahibawo nga ang kagamhanan sa siyudad kanunay’ng nagpaluyo kanila,” matud ni Osmeña.

Kini maoy katin-awan nga giluwatan sa mayor isip tubag sa mga pangutana kabahin sa maong plano human gibalik ni Presidente Rodrigo Roa Duterte ang kapolisan isip lead agency sa gubat batok sa gidiling drugas.

Ang gubat batok sa drugas ni Presidente Duterte ug ang kapolisan gisaway tungod sa mga human rights groups dinhi ug sa gawas sa nasud uban sa mga lider sa oposisyon nga sakop sa Liberal Party.

Unang nitingog mao si Bise Mayor Edgardo Labella sa iyang privilege speech sa niaging semana.

Si Labella maoy labing dako nga lider karon sa oposisyon diha sa City Hall. Ang mga sakop sa Team Rama nagpasakop sa niaging buwan sa PDP-Laban, ang partido sa Presidente.

Apan sukwahi sa maisugong baruganan ni Presidente Duterte, gisaway dayon ni Labella.

“Hinuon, giagi kini sa impunity ug wala’y pagtagad sa kinabuhi,” nagkanayon si Labella.

Matud ni Labella nga ang paggamit og pusil makiangayon lang kung ang law offender naghulga sa kinabuhi sa polis o ubang mga tawo.

Iyang gipasidan-an ang kapolisan nga istriktong mosubay sa mga lagda sa pagdakop ug nakalapas sa balaud.

Niduyog kang Labella si Arvin Odron, regional director sa Commission on Human Rights (CHR)-7, kay matud pa basin mosangpot kining paghatag og P50 mil og mga kalapasan sa tawhanong katungod.

Ang mga kauban ni Labella nga sila si Konsehal Raymond Garcia ug Joel Garganera niduyog sab sa baruganan ni Labella apan nisugyot nga mohatag na lang og mga abogado ang siyudad. Bisan pa man, gilantaw ni Osmeña ang kaayuhan sa kapolisan.

“Believe it or not,” matud sa mayor, “shooting a person is a life-changing experience, and the vast majority of policemen – especially Cebuano policemen – are not blood-thirsty killers. Police who end up having to perform the tragic side of their duty deserve support, and support is what we will give them.”— Gregg M. Rubio

Brgy workers sa camotes nakadawat sa cash gift

Moabot sa P3.8 milyones nga cash incentives ang giapod-apod sa Kapitolyo ngadto sa mga barangay workers sa upat ka lungsod sa Isla sa Camotes.  Ang 1,972 ka empleyado sa barangay apil na niini ang mga health workers, nutrition scholars, animal health aides ug day care workers ang nakadawat og tag P2,400 nga cash gift samtang P1, 500 usab alang sa mga tanod.

Si Gobernador Hilario Davide III maoy nangulo sa distribusyon sa maong cash gift sa Lungsod sa Poro, San Francisco, Tudela ug Pilar.

“The Capitol recognizes your sacrifice. In fact, you are the extension of the Provincial Government in providing services to the people,” matud sa gobernador.

Ang maong incentives subay kini sa matag tuig nga kalihukan sa Kapitolyo sa paghatag og cash gifts ngadto sa barangay workers.

Gawas sa cash gifts, 100 ka anti-vials shots ug dili mominus 10, 000 ka sets sa school supplies ang gihatag sa matag munisipyo sa Isla sa Camotes. (BANAT NEWS)