Van nag-parking kalit nasunog

CEBU, Philippines — Nakugang ang mga tawo dihang kalit nga nasunog ang nakaparada nga pribadong sakyanan nga van sa Barangay Poblacion, Dakbayan sa Toledo niadtong Sabado sa gabii.

Ang maong van gipanag-iya sa usa ka Nestor Manalo, hingkod ang panuigon, taga Lungsod sa Aloguinsan.

Matud ni Manalo nga gikan sila sa ilang tindahan sa Lungsod sa Pinamungajan ug nanglaag sa Dakbayan sa Toledo aron manihapon sa usa ka restaurant.

Kauban ni Manalo ang iyang drayber, umagad ug iyang tulo ka apo ug maayo na lang kay nakabiya na kini sa sakyanan dihang nasunog.

Matud sa drayber nga si Luiso nga nakit-an na lang niya nga niulbo nga nagkayo ang sakyanan nga nagsugod sa atubangan nga bahin.

Nakapasirit pa siya sa fire extinguisher apan wala mapawong ang kayo hinungdan nga nangayo sila og tabang sa Bureau of Fire Protection sa Toledo.

Si Senior Fire Officer 1 Ruthie Omayan sa BFP-Toledo nga maoy imbestigador nibutyag nga ila pang imbestigahan ang maong panghitabo sa pagtino sa hinungdan sa sunog.

Gisuta pa usab ang danyos sa nasunog nga sakyanan. (BANAT NEWS)