Sulbad sa tulis sa taxi nadiskubre sa taga CTU

CEBU, Philippines — Tulo ka tinun-an sa Cebu Technological University (CTU) main campus sa Dakbayan sa Sugbo maoy kampiyon sa sangka nga gilusad sa LEAR Philippines sa Sugbo sa pagdiskubre og sistema pinaagi sa cellphone nga mosulbad dayon sa mga krimen sulod sa usa ka taxi.

Si Dr. Ronald Galindo, Dean sa CTU College of Electrical and Computer Engineering Department niila sa mga tinun-an nga sila si Sercon Maiso Jr., Adrian Melgo ug Ailyn Ompad kinsa giatbangan sa mga tinun-an sa 26 ka unibersidad nga publiko ug pribado sa tibuok nasud diin ang CTU ang nigawas nga mananaug sa $2,500 nga premyo gikan sa nagpasiugda sa maong sangka nga mao ang LEAR Philippines.

Ang tema nga gisangkaan sa mga tinun-an nga nagtuon sa natad sa “research and innovation” mao ang “Emergency Short Message Services With Tracking System and Cloud Data Logging Using Internet of Things for Taxicabs” nga gipahigayon niadtong Nobiyembre 17 sa LEAR-PETC Cebu diin sa sayo pa nigawas nga usa sa mga finalists ang team sa CTU.

Ang team sa CTU nipresentar sa ilang ideya nga sa panahon nga tulison ang driver sa taxi, tulpokon lang niini ang keypad sa iyang cellphone ug diha-diha madawat dayon sa monitoring gadget sa ilang operator ang nahitabo sulod sa taxi ug maklaro usab ang hitsura sa driver ug sa tulisan lakip na ang lugar diin kini mahitabo nga maoy mahimong giya sa kapolisan sa pagsikop dayon sa tulisan.

Matud pa ni Galindo nga ang tulo ka estudyante pulos niya pinili ug upat ka buwan niyang gibansay una nisalmot sa maong sangka kauban sa ilang adviser nga si Engr. Gemel Palconit ug associate adviser nga si Engr. Junjun Obiso.

Nidugang si Galindo nga wala siya’y laing gitugon sa mga estudyante una sila mosulod sa lawak nga sangkaanan nga “kinahanglang mosalmot kamo sa maong bangga dili lang aron modaug, kundi mokampiyon.”

Gibatbat ni Galindo nga ubay-ubay na ang kadungganan nga nadawat sa CTU ilabi na sa engineering department sa mga eksamin nga nagsukod sa ilang katakus ug abilidad sa pangutok.

Apan sukad sa sinugdanan gikan sa pagka-Cebu Trade School, dayon Cebu State College of Science and Technology hangtud karon nga CTU na, karon lang tuiga nakadawat ang CTU og daghang pasidungog, labaw sa tanan ang dakong kantidad sa salapi nga ganti gumikan sa maayong abilidad ug pangutok sa mga estudyante, sumala pa ni Dr. Galindo.

Gipahigayonan dayon og usa ka haom nga programa ang mga estudyanteng kampiyon ug mapasigarbuhon kaayo sila si CTU President, Dr. Rosein A. Ancheta, Jr., CTU Vice President, Dr. Victor D. Villaganas, for Academic Affairs and Linkages ug uban pang mga dagkong opisyal sa CTU kinsa mahinangpon kaayong niabi-abi sa mga mananaug. (BANAT NEWS)