Ospital ug prisohan bisitahan sa imahen sa Santo NIño
CEBU, Philippines — Sugod karong adlawa ang imahen ni Senior Santo Niño mobisita diha sa duha ka tambalanan sa siyudad sa Sugbo.
Ang maong pagbisita sa imahen una kining higayon nga mahitabo sukad nga gisuroy kini diha sa nagkalain-laing lugar sa nasud.
Ang nahisgutang tambalanan nga bisitahon mao ang Vicente Sotto Memorial Medical Center (VSMMC) ug Cebu City Medical Center (CCMC).
Ang komunidad sa Agustino mibutyag nga ang maong kalihukan kalabutan kini sa kapistahan sa Balaang Bata. Sugod sa Disyembre 17, 2017 (karong adlawa) ang imahen mobisita diha sa VSMMC ug magpabilin hangtud sa Disyembre 19 o sa adlaw nga Martes ug sa maong adlaw usab kini ibalhin diha sa CCMC diin adunay overnight vigil na usab hangtud sa Disyembre 21 o sa adlaw nga Huwebes.
Si Padre Ric Anthony Reyes sa Order of Saint Augustine (OSA) ug mao usab ang Fiesta Senior 2018 secretary mikompirma sa Banat News kagahapon nga madayon ang maong plano tungod kay gihatagan na kini og pagtugot sa rector sa Basilica nga si Padre Pacifico Nohara, Jr.
Siya mipasabot nga ang Augustinian community nagtinguha nga hingusgan ang adbokasiya sa pagdala sa imahen ni Senior Santo Niño diha sa tanang mga deboto niini.
Gani, ang maong imahen gikatakda usab kining mobisita diha sa Cebu Provincial Detention and Rehabilitation Center (CPDRC) karong umaabot Enero 9 hangtud sa Enero 10, 2018. Kini nahimo nang tradisyon nga mobisita ang imahe diha sa mga piniriso.
Matud ni Padre Reyes nga ang pagbisita sa imahen mahimong oportunidad sa mga masakiton nga mipakita usab sa ilang pagtuo ug debosyon kang Santo Niño. (BANAT NEWS)
- Latest
