Suspetsadong mga kawatan sikop
CEBU, Philippines — Upat ka notadong kawatan ang nasikop sa kapolisan sa Cebu City Police Office (CCPO), sa Osmeña Boulevard, Barangay Kalubihan, isip padayon nga operasyon kontra kriminalidad.
Ang suspek nga nadakpan mao sila si Condrado Sombal Basmayor, 19, nagpuyo sa B. Rodriguez St., Barangay Sambag 2; Josemarito Cabreros Labra, 21, taga V. Rama St., Barangay Calamba; Kevin Pasquil, 19, F. Villa St., Barangay T. Padilla; Jake Lagos, 18, taga V. Rama St., Barangay Calamba, Dakbayan sa Sugbo.
Matud sa tigpamaba sa CCPO, Superintendent Artemio Ricabo, nga ang duha niini nga si Pasquil ug Lagos nakabiktima og estudyante niadtong petsa 14 sa hapon sa may Osmeña Blvd.
Sa follow-up operations nadakpan ang mga suspek apil na ang mga kauban niini.
Nakuha gikan sa upat mao ang duha ka kalibre .38 revolver nga adunay bala, ice pick ug cellphone nga gibana-banang nagkantidad og P9,700.
Sumala pa sa pasiunang imbestigasyon, maabot ang pagpangawat sa area of responsibility sa Carbon, Waterfront, Fuente Osmeña, Pari-an Police Stations.
Pasakaan og kasong kalapasan sa Republic Act 10591, o pagkupot og walay lisensiya nga armas ang mga suspek.
Nahibaw-an sa imbestigasyon nga aduna nay record sa pagpangawat ug pagkupot og ginadiling drugas ang upat dihang menor de edad pa kini.
Padayon ang imbestigasyon nga gibuhat sa mga nadakpan aron masusi kung aduna pa’y laing kaso sa pagpangawat nga ilang nabuhat.
Kasamtangan nga gitanggong ang upat sa Carbon Police Station. (BANAT NEWS)
- Latest