Anti-smoking wa pa napatuman

CEBU, Philippines — Wala pa gyud makapatuman sa anti-smoking ordinance ang kagamhanan sa Siyudad sa Talisay bisan dugay na kining giaprubahan.

Kini ang hinungdan nga daghan gihapong mga tawo nga manigarilyo ang pataka lang og bulhot sa aso.

Si Konsehal Richard Francis Aznar, chairman sa committee on health, nibutyag nga naa pa lang gyud sila sa pagpahibawo sa katawhan nga aduna na sila’y naaprubahan nga ordinansa sa pag- regulate sa pagpanigarilyo gumikan sa kakuwang nila og tawo nga mo-implementar niini.

Ang anti-smoking ordinance naaprubahan sa konseho niadtong Pebrero nunot sa kamanduan ni Presidente Rodrigo Duterte.

Makita sa probisyon sa anti-smoking ordinance nga ang usa ka establisemento mobutang og designated smoking area nga dili makahasol sa mga tawo nga dili manigarilyo.

Gipanghinaut ni Aznar nga maka-hire na unya sila og mga tawo nga himuong task force nga maoy mopatuman sa ordinansa aron mabutangan og ngipon ang balaud nga ilang giaprubahan. (BANAT NEWS)