Urduja wa kapiog sa mga nitambong sa misa de gallo

CEBU, Philippines — Taliwala sa pag-uwan ug kabugnaw sa kaadlawon nga gisamotan sa bagyong Urduja, wala kini makapabugnaw sa kainit sa katawhan sa Romano Katoliko aron pagtambong sa unang Misa de Gallo nga pagsugod sa siyam ka adlaw nga nobena sa dili pa ang Pasko.

Ang mga nag-unang dagkong mga simbahan dinhi sa Sugbo sama sa Basilica Minore del Sto. Niño, Cebu Metropolitan Cathedral, Sto. Rosario Parish Church, Our Lady of Guadalupe National Shrine Parish, Saint Joseph Parish sa Mabolo, National Shrine of Saint Joseph sa Dakbayan sa Mandaue ug daghan pa ang gidugok sa mga   tawo.

Tungod sa kadaghan sa mga nanimba hasta ang mga parkingan sa mga sakyanan ug karsada napuno sa mga nanimba aron pagpaminaw sa Maayong Balita. Sa Mandaue City, nagsugwak usab ang mga tawo sa mga simbahan nga nahimutang sa mga barangay sa dakbayan mao ang San Roque Parish Church sa Barangay Subangdaku,  Holy Family  Church sa Casuntingan, Christ The King sa Alang-Alang,  Santo Niño Church sa Paknaan, Our Lady of Fatima Parish Church sa Barangay Basak ug uban pa.

Sama sa gisaad, nagpadala og mga polis ang kapolisan samtang adunay gi-deploy nga mga traffic enforcers ug mga medical personnel ang mga local government units.

Ang tigpamaba sa Police Regional Office-7, Superintendent Reyman Tolentin, miingon nga “generally peaceful” ang unang gabii sa Misa de Gallo sa tibuok rehiyon.

 “Makita gyud nato nga mas daghan ang tawo kompara sa normal nga kapasidad, kay nalapas man sa sulod, naa ma’y naglingkod sa gawas, niya nagpayong,” si Tolentin miingon sa Banat News.

Apan nagtuo siya nga sa paglabay sa mga adlaw mokunhod ra pud sa tunga-tunga ug mobalik ra o modoble ang gidaghanon sa kataposang adlaw sa dili pa magPasko. (BANAT NEWS)