5,000 ka pamilya nibakwit Northern Cebu

CEBU, Philippines — Gibanabanang singko mil ka pamilya gikan sa upat ka mga lungsod sa Northern Cebu ang gipabakwit kagahapon sa pagtugpa sa bagyong Urduja sa kayutaan nga nakaapektar sa maong dapit sumala pa sa Provincial Disaster Risk Reduction and Management Office (PDRRMO).

Ang kadaghanan sa mga nibakwit nagagikan sa Daanbantayan. Sumala pa nga 4,126 ka pamilya gikan sa 20  ka barangay ang namiya sa ilang mga panimalay ug nipahiluna sa community-based evacuation areas.

Sumala pa ni Daanbantayan Mayor Vicente Loot kaning community-based evacuation areas naglakip sa mga balay sa mga silingan nga ginama sa semento ug mas lig-on.

Wala hinuon maglisod ang mga otoridad sa lungsod pagkombinsir sa mga residente paghiklin dayon sa mas lig-on nga kapasilongan. Matud ni Loot posibleng naleksyon na sila sa nahitabo atol sa pag-igo sa super typhoon Yolanda niadtong tuig 2013.

Si PDRRMO Chief Baltazar mihulagway sa gibuhat sa Daanbantayan nga usa ka “massive evacuation.”

Dul-an 100 ka pamilya gikan sa lima ka mga barangay sa Dakbayan sa Bogo, 30 ka pamilya sa Sogod ug 12 ka pamilya sa Madridejos ang gipabakwit tungod sa mga pagbaha dala sa bagyong Urduja.

Samtang kadaghanan sa mga kalungsoran didto nakasinati lang og ginagmay nga danyos tungod sa kakusog sa hangin nga nakahapay sa mga pananom nga saging ug pipila ka mga punoan sa lubi ug mga kahoy.

Si Bogo City DRRM Officer Ben Frederick Rodriguez mibutyag nga 70 ka pamilya ang gipabakwit tungod sa pagsaka sa tubig kagahapon.

Gipaspasan usab sa mga Bogo DRRM personnel ang paghawan sa mga natumba nga mga punoan sa kahoy nga nakaali sa agianan padung sa upat ka mga apektadong barangay sa Nailon, Taytayan, Dakit ug Gairan.

Usa ka karsada usab sa Barangay Tinubdan sa Daanbantayan ang nahunlak ug dili na paagian og dagkong mga sakyanan ug kinahanglang adto na lang moagi sa alternative road sa Barangay Kawit.

Sa Medellin, nahunlak usab ang karsada sa Barangay Dalingding ug dili gyud maagian sumala pa sa ilang MDRRMO Operations on Warning Officer Stephen Yurag.

Samtang daghang mga tawo nga padung unta motabok sa Bantayan Island ang nangatanggong sa Hagnaya Wharf sa San Remigio tungod kay peligrong mobiyahe.

Dinhi sa dakbayan sa Sugbo, padayon ang pagbantay sa mga bukirong mga barangay human matud pa ni Cebu City Disaster Risk Reduction and Management Office Operations Chief Harold Alcontin adunay mga minor landslides sila nga narespondehan kagahapon sa barangay Sirao. Aduna sab mga natumba nga mga kahoy sa barangay Cambinocot, Sudlon 1, ug barangay Lahug nga nakaingon sa brownout tungod kay naigo ang linya sa kuryente.

Samtang may mga pananom nga nangaguba sa bukirang bahin sa Barangay Adlaon. Wa hinuoy nakalas o nangaangol tungod sa bagyo. (BANAT NEWS)