Upat patay sa Eastern Visayas

CEBU, Philippines — Upat ka tawo ang giingong patay samtang adunay mga na-missing sa nahitabong pagdahili sa yuta ug pagbaha sa Eastern Visayas ilabi na sa Eastern Samar ug Ormoc City sa Leyte sa pagtugpa sa bagyong Urduja.

Samtang dinhi sa Sugbo, dul-an 100 ka pamilya ang gipabakwit sa mas luwas nga lugar sa Northern Cebu tungod sa peligro sa pagbaha ug flashfloods.

Sa report sa GMA News.Tv, duha ang kompirmadong patay sa usa ka barangay sa Almeria, Biliran kagahapon sa hapon.

Matud pa sa mga opisyales sa maong lungsod, ang mga nakalas mao silang Jimmy Jorge, 2; ug Winnie Garbo, 55 samtang gipangita pa sa mga rescuers ang duha nga sila si Maribeth Garbo, 50; ug Wilma Garbo, 12.

 Samtang sa Ormoc City duha ang patay diin ang usa babaye sa nahitabong landslide sa Brgy. Tongonan ug tulo ka tawo ang giingong gianod sa baha sa Brgy. Liloan. Wa pa ilha ang ikaduhang giingong nakalas.

Wala pa usab ibutyag ang mga pangalan sa mga biktima apan sumala pa sa city disaster risk reduction management officer nga si Ciriaco Tolibao natabunan niadto pang nakalabay nga gabii ang maong babaye ug kagahapon lang sa buntag nakuha ang lawas niini.

Si Vice Mayor Leo Carmelo Locsin Jr., sa telephone report ngadto kang Mayor Richard Gomez miingon nga nasaksihan gyud nila kadtong tulo ka tawo nga gianod sa kusog nga bul-og sa tubig. Matud pa nga 200 metros lang ang distansya sa mga biktima apan wala sila mapadul-i tungod sa kakusog sa sulog sa tubig.

Si Mayor Richard Gomez, mimando og pre-emptive evacuation sayo pa lang kagahapon ug personal nga nangulo sa rescue operations.

Kagahapon sa alas- 2 sa hapon giingong aduna nay kapin 800 ka pamilya gikan sa mga flood prone areas sa siyudad ang gipabakwit.

Bisan ang mga sakop ni Sr. Supt. Ramil Ramirez, sa Ormoc City Police Station nitabang na sa rescue operations kauban ang Ormoc Rescue , Red Cross of the Philippines-Ormoc Chapter, ug 802nd Army Brigade.

Sa laing bahin, adunay dili pa kompirmadong report nga may usa ka sakop sa Philippine Coast guard nga nitabang sa rescue operation ang napaakan og bitin diha sa liog.

Sa Northern Samar , gipaubos sa state of calamity ang Catarman ug Catubig samtang gibahaan usab ang ubang mga lungsod sa Gamay, San Jose, Laoang, Lope de Vega, Las Navas, ug Mondragon sa mao gihapong probinsya.

Bisan ang Tacloban City gipaubos na usab sa state of calamity tungod  sa pagbaha matud pa ni    Vice Mayor Jerry Yaokasin

Gibanabana sa Regional Disaster and Risk Reduction and Management Council 95 mil ka mga tawo sa Eastern Samar, Leyte,ug Samar provinces ang naapektahan sa landslides ug baha tungod ni Urduja.

Gibahaan usab ang mga lungsod sa Calbiga, Basey, Marabut, San Jose de Buan, Jiabong, Pinabacdao, San Jorge, Sta. Rita, ug Talalorasa Samar; Tacloban City, Carigara, Ormoc City, Palo, Tanauan, Sta. Fe, Alangalang ug Matalom sa Leyte; samtang sa Eastern Samar gibahaan ang Taft, Maslog, Jipapad, Arteche, Gen. MacArthur, Giporlos, Hernani, San Julian, Llorente, Sulat, Maydolong, Taft, ug Oras.

Adunay mga natala nga landslides sa Tacloban, Matag-ob, Babatngon,ug San Miguel sa Leyte; Catbalogan City, Daram, Sta. Rita sa Samar; Llorente, Giporlos, San Julian, ug  Maydolong sa Eastern Samar; Maasin City ug Liloan sa Southern Leyte. (BANAT NEWS)