TOR sa scholars ihatag na sa ACT
CEBU, Philippines — Bisan og dili pa makabayad ang kagamhanan sa Siyudad sa Sugbo, andam i-release sa Asian College of Technology ang Transcript of Records (TOR) sa mga scholars nga tinun-an sa maong tunghaan.
Kagahapon nagtigum ang siyudad ug ang ACT ug ilang gi-finalize ang terms sa ilang compromise agreement. Kahinumduman nga si South District Representative Rodrigo “Bebot” Abellanosa nga maoy presidente sa ACT ug konsehal kaniadto sa siyudad ang nag-atubang og kaso dihang nisulod og kasabutan sa scholarship program tali sa kagamhanan sa siyudad.
Kini ang hinungdan nga dunay mga scholars nga nigradwar sa ACT ang wala nakakuha sa ilang TOR tungod sa wala pagbayad sa siyudad sa obligasyon sa tunghaan.
Hinoon duna nay kahayag sa maong problema ug mahatagan na og kasulbaran human nagkasabot ang duha ka habig nga mag-compromise agreement ug naaprubahan na sab kini sa korte.
Sigun ni Konsehal Joy Augustus Young, deputy mayor on education and scholarship, nga ang buhaton sa mga tinun-an aron ma-release ang ilang TOR mao ang pagkuha og clearance ug kun mahuman ila kining iduso sa Registrar’s office.
“Di na kinahanglan og COA ani, we will inform the COA but di na kinahanglan aprubahan sa COA kay di man gud ni money claim, the case was declaratory relief which is unsa man ni, mobayad mi dili pa ba, mo-inform lang ta sa COA nga naa nay decision sa korte unya bayran namo, di man na money claim, I ask the lawyers about that already but ato lang i-inform ang COA gihapon,” sigun ni Young.
Gipaabot niya nga ang bayran sa siyudad anaa na lang sa P56 milyones isip settlement amount gikan sa P186 milyones nga gipaningil sa tunghaan human gi-waive sa ACT ang interest niini.
Tinguha sa siyudad nga mabayran ang ACT sa labing daling panahon. (BANAT NEWS)
- Latest