OCD natagbaw sa quake drill sa Centcom

CEBU, Philippines — Nisalmot ang Armed Forces of the Philippines-Central Command (AFP-CentCom) sa nationwide simultaneous earthquake drill kagahapon.

Matud ni Col. Medel Aguilar, CentCom assistant chief sa Unified Command staff for Civil Military Operations, nga ang ilang pagsalmot sa maong kalihukan isip pagtubag sa posibleng resulta sa Big One ug masukod ug ma-validate sab ang ilang contingency plan “Pagluwas”.

Matud niya nga kung mausab ang nahitabong pag-uyog sa Bulacan, aduna na silay giandam nga contingency plan.

Sumala pa niya nga bisan dili masinati ang pag-uyog apan ang siren nga madunggan usa kini nga timailhan nga aduna silay misyon nga nanginahanglan og dali nga pagresponde.

Dugang ni Aguilar nga ang ilang papel mao ang paghan-ay, suporta ug pag-deploy sa humanitarian assistance in disaster response operation sa Northern Luzon Command.

Samtang si AFP incident commander, Col. Ariel Bionat, nibutyag kabahin sa kalampusan sa ilang gipahigayon nga earthquake drill.

Matud niya nga sakto ug natumong sa oras nga ilang gitinguha ang pagpahigayon sa ilang drill apan aduna siya’y nakita nga usa ka lapso ug mao kini ang tingug sa alarma kay matud niya, dili kini kusog nga madunggan sa tanan ug kini tungod kay dako-dako sab ang ilang lugar.

Tungod niini, paninguhaon sa sunod nga quarter nga masulbad ug mapa-usbaw ang maong gamay nga lapso.

Samtang si Dennis Atto sa Office of Civil Defense mao ang ni-evaluate sa maong kalihukan sa AFP ug nihatag siya og “very satisfied” nga satisfaction level kay nakita niya nga seryoso sa pagbuhat sa duck, cover and hold ang mga sakop sa militar. (BANAT NEWS)