Lima ka pamilya gipabakwit

CEBU, Philippines — Di momenus lima ka pamilya ang gipabakwit didto sa lungsod sa Sogod tungod sa ka delikado sa lugar diin sila magpuyo kay agianan kini sa baha hinungdan nga gibutang sila karon sa evacuation center.

Ang kapolisan mipahibalo nga andam silang mopatuman og force evacuation kon gikinahanglan aron maluwas ang mga tawo gikan sa pagbaha ug pagdahili sa yuta.

Didto sa lungsod sa Tabogon adunay gamay usab nga pagdahili sa yuta sa dalan sa Sitio Camilyang, Barangay Labangon nga padung sa Dakbayan sa Bogo.  Matud ni Julius Regner tigpamaba sa Provincial Disaster Risk Reduction and Management Office (PDRRMO) nga nakordonan na hinoon ang lugar ug nabutangan og signage pahimangno sa mga motorista.

Ang PDRRMO nakadawat usab og report bahin sa pagbaha sa lungsod sa Carmen ug Dakbayan sa Danao apan wala kini mopahigayon og pre-emptive evacuation.

“Atong gipatas-an ang atong pagmonitor ilabi na sa kadagatan ilabi na ang mga landslide prone areas, baha and kani sang kadalanan kay danlog basin og naay mahitabo,” sigun pa sa tigpamaba sa Police Regional Office-7 Supt. Reyman Tolentin.

Alerto na sab ang Regional Public Safety Battalion didto sa amihanang bahin sa probinsya sa Sugbo ilabi na didto sa isla sa Bantayan nga nag-atubang sa Leyte nga gipaubos sa signal number 2 tungod sa bagyong Urduja.

Ang Talisay City mipahimutang daan sa ilang walo ka mga backhoe ug dagkong trak sa bukirong mga barangay aron makaresponde dayon kon  may mga pagdahili sa yuta.

Si Alvin Santillana, pangu sa City Disaster Risk Reduction and Management Office (CDRRMO) nibutyag nga sa wala pa ang bagyong Urduja gihangyo na nila ang mga kontraktor nga nagtrabaho sa road widening sa Talisay paingon sa dakbayan sa Toledo nga tabangan sila kon adunay mga dili matag-an nga panghitabo. (BANAT NEWS)