Santa Bike giuswag tungod sa bagyo
CEBU, Philippines — Giuswag una sa kagamhanan sa dakbayan sa Lapu-Lapu ang paglusad sa Santa Bike diha sa kabarangayan sa isla sa Olango tungod sa dautang panahon nga dala sa bagyong Urduja.
Ang Santa Bike nga langkuban sa 150 ka bikers gikan sa mainland sa siyudad ang magsul-ob kini og sinena sa Santa Claus magsakay og bisikleta magdala og mga pinutos nga pinaskohan nga ipanghatag ngadto sa kabalayan nga ilang maagian diha sa 11 ka barangay sa isla.
Si Mayor Paz Radaza maoy nagpasiugda sa maong kalihukan sa matag tuig diin gawas sa mga barangay sa isla mosuroy usab kini diha sa mga barangay sa mainland sa maong dakbayan.
Ang pag-uktaba sa maong kalihukan natigayon human usa sa mga shipping firm mipahibalo sa pagsuspenso sa ilang mga biyahe sa pipila ka mga dapit nga naapektohan sa tropical depression Urduja.
Naglakip sa mga advisory nga gipahibalo sa Cebu Port Authority mao ang pipila ka mga biyahe sa kadagatan sa silingang lalawigan nga naglakip sa Ormoc City, Samar ug uban pa.
Kini gibase usab sa taho sa Philippine Atmospheric, Geophysical and Astronomical Services Administration (PAGASA) nga ang amihanang bahin sa lalawigan sa Sugbo gipaubos sa storm signal number one. (BANAT NEWS)
- Latest