Pabuto dili ipabaligya sa Talisay
CEBU, Philippines — Gipahibawo sa kapolisan sa Siyudad sa Talisay nga gidili gyud ang mga pabuto nga ibaligya sa dili designated area tungod kay makamugna kini og peligro sa katawhan ingon man mga establisemento nga naa sa duol.
Si Supt. Jason Villamater, hepe sa kapolisan sa Siyudad sa Talisay, nagkanayon nga gipaabot pa nila ang pagpatawag sa kadagkuan sa Talisay City Hall kun aduna bay designated area para sa mamaligya og pabuto.
Apan sa pagkakaron nga wala’y designated area nga giila ang kagamhanan, dili kini pasabot nga mahimo rang makabaligya ang bisan kinsang tawo og pabuto sa bisan asa nga lugar.
Una nang nipahibawo sa kadagkuan sa kabomberohan sa maong dakbayan nga ila unang badlungon ang makit-an nilang mamaligya og pabuto apan sikopon kun kini magmagahi gyud.
Si Villamater nitataw nga mahimo ra gyud kaayo nga magpauban ang kabomberohan sa iyang mga sakop aron makita gyud sa katawhan nga seryuso sila bahin sa seguridad labot sa pabuto.
Niadtong nilabay nga katuigan daw gubat ang nahitabo sa ilawom sa flyover sa Barangay Tabunok sa maong siyudad human usa ka pasahero sa bus nga niagi ang nilabay sa iyang upos nga sigarilyo ug didto tugpa sa naglaray nga baligya nga pabuto kilid sa karsada.
Matud ni Villamater nga tinguha nila nga dili kini masubli ang panghitabo aron saulogon ang Pasko sa Talisaynon nga malinawon ug wala’y disgrasya nga mahitabo.
Sa pagkakaron wala pa sila’y na-monitor nga namaligya og pabuto apan duha ka mamaligyaay og pyrotechnics ang gitugutan nga makabaligya sa gawas sa mall sa Barangay Bulacao human nakakuha og permit. (BANAT NEWS)
- Latest