Dutch, ‘gun-for-hire’ sikop sa Camotes
CEBU, Philippines — Gidakop pinasikad sa search warrant sa kasong illegal firearms ang upat ka sakop sa grupo sa gituohang mga gun-for-hire ug ang usa ka Dutch sa managlahing higayon sa Lungsod sa San Francisco ug Poro, Isla sa Camotes niadtong Miyerkules sa hapon.
Sigun sa tigpamaba sa Criminal Investigation and Detection Group-7, Senior Insp. Edwin Lacostales, nga nadeskubrehan nila ang grupo sa maong mga lungsod nga ginganlan og Otadoy Criminal Group.
Ang mga dinakpan naila nga sila si Jimmy Ibot, 46; Hanzel Bensig, 40, ug Benjie Castardo, 38, pulos taga Lungsod sa San Francisco.
Naapil sab ang gikatahong lider sa grupo nga si Allan Otadoy, 47, taga Barangay Cagcagan, Poro.
Atol sa pagronda, nakuha gikan kang Ibot ang usa ka kalibre .45 STI Edge, usa ka kalibre .45 pistol ug mga bala niini.
Gikan kang Bensig nakuha ang usa ka paltik nga kalibre .357 ug gikan kang Castardo ang usa ka kalibre .45 pistol, 15 rounds nga bala niini, upat ka magazine, holster ug usa ka sling bag.
Nakuha gikan sa posesyon ni Otadoy ang usa ka kalibre .45 ug pipila ka bala niini.
Samtang, gisilbihan sab og search warrant ang Dutch nga si Niklaas Vondeling, 60, ug kasamtangang nagpuyo sa South Poblacion, San Francisco.
Butyag pa ni Lacostales nga nakadawat sila og sumbong gikan sa mga concerned citizen nga pirmeng magdala-dala ang maong langyaw sa iyang armas ug matud pa daghan kining tinagoang armas nga paso na ang lisensiya.
Dihang gironda, nasakmit ang usa ka kalibre .9mm pistol, duha ka kalibre .45 ug usa ka shotgun lakip na ang mga bala niini
"Dili man na tinuod. Dili mi gun-for-hire. Love-for-hire ra mi," sigun pa ni Ibot ngadto sa mga sakop sa media. (BANAT NEWS)
- Latest