3rd bridge tawgong Snr. Sto. niÑo

CEBU, Philippines — Buot panganlan og Senior Sto. Niño Bridge sa Presidential Adviser sa Legislative Affairs nga si Sec. Adelino Sitoy ang ikatulong taytayan nga magsumpay sa Siyudad sa Sugbo ug Munisipyo sa Cordova.

Gipasabot ni Sitoy nga gimahal sa mga Sugbuanon ang Balaang Bata ug tukma usab kini kay ang imahe nagagikan sa España diin usab gikan ang kontraktor nga motukod niini nga Acciona Construccion.

Kagahapong adlawa gihimo ang ceremonial awarding sa kontrata alang sa Cebu-Cordova Link Expressway (CCLEX) kagahapon diha sa Waterfront Cebu City Hotel. Ang taytayan sugdan pagtukod sa sunod tuig ug gibana-bana nga mahuman kini sa tuig 2021.

Ang express way magsilbing alternatibong agianan gikan sa mainland Cebu padung sa  isla sa Mactan diin nahimutang ang Mactan Cebu International Airport Authority (MCIAA) ug ang Metro Cebu, ang sentro sa regional growth sa tibuok Central Visayas.

Ang maong taytayan gipanglantawang makasulbad sa problema sa trapiko sa dakbayan sa Sugbo ug sa Cordova. Gibana-bana nga 40 mil  ka mga sakyanan ang makaagi niini matag adlaw.

Labaw sa tanan gipaabot nga mosaka ang ekonomiya sa Sugbo ug makahatag og dugang trabaho sa mga Sugbuanon matud pa sa pangulo ug CEO sa Metro Pacific Tollways Corporation (MPTC) nga si Rodrigo Franco.

Samtang ang pangulo og General Manager sa CCLEX Corporation nga si Allan Alfon miingon nga siguraduhon nilang lig-on ug labing maayong kalidad nga taytayan ang ilang tukoron.

Nitambong usab si Mayor Tomas Osmeña, Bise Mayor Edgar Labella ug Mayor Mary Therese Sitoy-Cho, ang mayor sa Cordova sa maong kalihokan.

Ang CCLEX adunay gitas-on nga 8.5-kilometro ug di momenos P22.6 Bilyones ang budget sa pagtukod niini. (BANAT NEWS)