5 ka adlaw family day sa CPDRC

CEBU, Philippines — Gilugwayan ngadto sa lima ka adlaw ang Family Day sa mga piniriso sa Cebu Provincial Detention and Rehabilitation Center (CPDRC) sugod sa Disyembre 25 ngadto sa 29.

Matud ni Audesti Miguel, acting jail warden, nga gibahin nila ka lima ang schedule sa mga dalaw sanglit dili tanan ang mapasulod sa provincial jail.

Ang pamilya sa mga piniriso sa cell number 1 ngadto 25 maoy naka- schedule sa petsa 25 atol gyud sa Pasko ug sundan kini sa cell number 26 ngadto sa 50.

Sa petsa 27 mao ang sa cell number 51 ngadto sa 75, sa petsa 28 sa selda 76 ngadto sa 100 samtang sa uwahing adlaw sa petsa 29 mao ang mga dalaw sa cell number 101 ngadto sa 119.

Matag piniriso mamahimong mabisitahan sa tulo ka sakop sa pamilya sama sa ginikanan, asawa o bana ug anak apan ang tugtan ra mao ang 10-anyos nga bata pataas.

Tugtan na sa kadagkuan sa CPDRC nga makadala og pagkaon ang mga dalaw apan kinahanglan nga luto na kini daan ug ibutang sa makita nga sudlanan ug limitahan ra ngadto sa lima ka kilo ang gibug-aton.

Gidili sab ang pagpadala og kutsara ug tinidor ingon man mga hait nga kagamitan. Gidili sab ang mga napkins ug diapers aron dili makabara sa drainage sa prisohan.  Magsugod ang Family Day alas 8 sa buntag ngadto sa alas 2 sa hapon ug wala’y overnight.  (BANAT NEWS)