14-anyos gidala’g motel

CEBU, Philippines — Usa ka Chinese national ang gidakop sa mga sakop sa Casuntingan Police Station sa gipahigayon nga Entrapment Operation niadtong Martes sa hapon nga gihimo diha sa usa ka hotel sa may Barangay Banilad, Dakbayan sa Mandaue tungod sa pagdala niini og menor de edad sa maong establisamento.

Naluwas sa kapolisan ang 14-anyos nga batang babaye nga giingong gidala sa suspek nga si Mark David Tan Cue, 37,  taga Barangay Subangdaku sa mao gihapong siyudad.

Gitug-an sa Women and Children’s Protection Desk sa Casuntingan Police Station nga alarming na ang panghitabo tungod kay nagkadaghan na ang mga menor de edad nga nalambigit sa prostitusyon ug menor de edad ra usab ang nahimong bugaw.

Nabisto kini human usa ka 14-anyos nga batang babaye kuyog sa iyang inahan nga nitaho   kanila ug misumbong nga nakighilawas ang iyang anak sa usa ka Chinese national sulod sa usa motel niadtong Martes sa hapon.

 Matud pa nga nikontak pagbalik ang maong Chinese national sa iyang anak kay gusto na usab niini makighilawas sa maong dalagita bugti sa kwarta hinungdan nidangop ang inahan sa bata sa mga polis ug gilusad dayon ang entrapment operation batok sa suspetsado sulod sa usa ka motel uban ang biktima.

Matud pa ni Police Chief Ildefonso Miranda Jr, WCPD sa Station 4, gipalawman nila karon ang imbestigasyon aron pag-ila sa babaye nga bugaw  nga giingong usa usab ka minor de edad  ug schoolmate sa biktima.

Dugang pa ni Miranda, nikontak ang maong suspetsado ngadto sa minor de edad tungod kay nakauyon kini kaniya.

Apan tungod kay dili na buot ang biktima sa nahitabo kaniya nisumbong kini sa iyang ginikanan rason nga nahitabo ang entrapment operation.

Gitug-an ni Miranda, P3 mil ang bayad sa pakighilawas sa batan-on ngadto sa iyang kustomer apan P2 mil ra ang madawat niini samtang ang usa ka libo padulong ngadto sa bugaw.

Si Miranda nakig-alayon karon sa kagamhanan sa Dakbayan sa Mandaue aron sutaon kung aduna bay ordinansa nga magsilot sa mga motels, pension houses o hotels nga motugot sa ilang mga guests makadala og minor de edad nga di nila ig-unsa diha sa ilang mga lawak.

Sumala pa nga ilang nasayran nga dili na mosusi ang mga establisemento sa mga guests kon kini nagsakay og awto nga mosulod basta makabayad lang kini.

Awhag karon ni Miranda, sa tanan mga establisemento sa ilang lugar nga motaho gayud sa kapulisan kon magdala og minors ang ilang guest unya dili ig-unsa sa bata.

Giandam na sa kapulisan ang kasong Trafficking batok kang Cue ug giawhag nila ang uban pang mga biktima niini ilabi na ang mga minor de edad nga mopatim-aw sa Casuntingan Police Station. Ang suspetsado gisuwayan pagkuha sa media og pamahayag bahin sa pasangil ngadto kaniya apan nagdumili kini paghatag og pamahayag. (BANAT NEWS)