Consultants sa City Hall di paswelduhan

CEBU, Philippines — Gihangyo sa konseho sa Siyudad sa Sugbo ang City Accountant Office nga pugngan ang binuwan nga sweldo sa mga consultants samtang dili masunod ang mga rekisitos sa balaud.

Kini human si Konsehal Raymond Garcia niingon nga ang pag-hire og mga consultants kinahanglan mosubay sa Republic Act No. 9184 kon ang Government Procurement Reform Act.

Sa legal opinion sa City Legal Office, gikutlo ni Atty. Bernard Inocentes Garcia ang lagda nga kinahanglan nga narehistro sa Philippine Government Electronic Procurement System (PhilGEPS) ang consultant.

Ang kakuwang sa maong rehistro mao ang gibasehan sa pagbasura sa Bids and Awards Committee-Infrastructure sa pagkuha og consultants sa pipila ka konsehal nga sakop sa oposiyon.

Nagkanayon si Konsehal Margarita Osmeña nga napahibawo siya nga ang BAC magsugod sa pag-require sa mga consultants nga marehistro sa PhilGEPS sugod sa Enero sunod tuig sanglit ang mga consultants gikan niadtong Hunyo hangtud karong buwana naaprubahan na.

Apan si Garcia niingon nga ang siyudad angay mosunod sa unsay naa sa balaud.

Si Konsehal Joel Garganera sa iyang bahin nga sila sa oposisyon gipahibawo sa rekisitos niadto pang Hulyo base sa suwat sa BAC.

Gawas sa resolution nga mag-approve sa pag-hire og consultants, i-require ang tanang consultants nga ipasukip ang PhilGEPS registration sa dili pa aprobahan sa konseho. (BANAT NEWS)