93-1 land swap deal naunsa na?

CEBU, Philippines — Usa ka tuig human ang 93-1 land swap deal tali sa kagamhanan sa siyudad sa Sugbo ug probinsiya sa Sugbo wala pa gihapon nahuman ang maong kasabotan tungod kay wala pa gihapon kini aprubahi.

Ang Division Chief sa Division for the Welfare of the Urban Poor (DWUP) Atty. Meriam Consuelo Fernandez ang disposition sa mga properties nag-ung-ong  pa gihapon kay gipaabot pa ang pagtugot gikan sa Commission on Audit (COA).

Niadtong Disyembre 1, si Fernandez uban ang abogado sa Probinsiya sa Sugbo miadto sa ulohang buhatan sa COA aron isumitir ang mga dokumento mahitungod sa land swap deal.

Ang rason sa pagpangayo nila og approval sa COA aron masiguro nga legal ang land-swap deal sa duha ka Local Government Units aron dili sila makiha. Usa sa nakalangay sa proyekto mao ang appraisal kay daghan nga mga properties ang involved. Ang mga luna nga apil sa land swapping mao ang 32.4 hectare lots ubos sa Provincial Ordinance No. 93-1 nga ibalhin sa siyudad pinaagi sa pagbinayloay og properties.

Samtang ang City Government mo-swap sa 2.5 hectare lot sa SRP, 13,711 square meter lot sa Sewerage Treatment Plant, 2,475 square meter Slaughter House diha sa North Reclamation Area ug uban pa.

Masaligon ang duha ka lokal nga kagamhanan nga sa buwan sa Enero sunod tuig makuha na nila ang approval sa COA , apan kon madugay gyud mangita sila og laing legal remedies. Sila si Mayor Tomas Osmeña ug Gov. Hilario Davide III misaad atol sa ilang pangampanya sa 2016 elections nga ilang sulbaron sud sa unom ka buwan kining problemaha, apan hangtud karon wala kini makab-ot.

 Niadtong Disyembre 7, 2016 nagpinirmahay silang Osmeña ug Davide III og Memorandum of Agreement sa land swapping.

Gibana-bana nga moabot sa 5,000 ang beneficiaries sa 93-1 gikan sa 11 ka barangay sa siyudad sama sa Kamputhaw, Capitol  Site, Kalunasan, Busay, Bo. Luz, Lahug, Mabolo, Apas, Lorega San Miguel, Kasambagan ug Tejero.

Samtang sila si Konsehal Raymond Garcia ug Konsehal Joel Garganera sa Barug Team Rama nangayo og kalambuan mahitungod sa 93-1 human masayod nga usa ka tuig na ang nakalabay human sa pinirmahay sa MOA.

“Himoon na sad na niyang election nga issue iya na sad na i-resurrect months before the election but look he has a year nga wala pa gyud ta, wa pa gyu’y lihok bisan gamay anang 93-1,” sigon ni Garganera. (BANAT NEWS)