Gimingaw sa mga anak naghikog
CEBU, Philippines — Ginang nga gimingaw sa iyang mga anak nga iyang nabiyaan sa ilang lugar sa Dakbayan sa Toledo ang nagkutlo sa iyang kinabuhi alas 11 pasado sa buntag sa may Barangay Bulasa, Lungsod sa Argao.
Ang nagkutlo sa iyang kinabuhi mao si Corazon Putchadez, 38, lumad nga taga Dakbayan sa Toledo apan temporaryong nagpuyo sa Lungsod sa Argao.
Matud ni Police Officer 2 Clifford Butron, imbestigador sa Argao Police Station, nga nikuyog si Putchadez sa iyang bag-ong kapuyo nga si Mario Rabines human kapila kini nakulatahi sa iyang bana.
Sumala pa ni Butron nga kapila na mag-estorya si Putchadez ngadto kang Rabines ug sa iyang mga kaila nga gimingaw kini sa iyang mga anak apan dili makahimo tungod sa kalagot sa iyang bana kaniya.
Matud ni Butron nga kagahapon sa buntag sa pag-abot ni Rabines gikan nanagat, didto na kini niya nabantayan nga sirado ang ilang panimalay ug sa iyang pag-abli nagbitay na si Putchadez.
Dali kining gidala sa tambalanan apan gideklarar nga patay na.
Depresyon maoy nakita nga hinungdan sa pagkutlo sa ginang sa iyang kinabuhi ilabi na nga nagsingabot na ang Pasko nga wala ang iyang mga anak. (BANAT NEWS)
- Latest
