Baligyang pabuto pangsakmiton

CEBU, Philippines — Ang Chairman sa Committee on Public Order and Safety Konsehal Dave Tumulak nanawagan sa kabarangayan nga bantayan kining mga magsige og pabuto human nabantayan nga aduna na say daghang nagsige og pabuto.

Giawhag ni Tumulak ang kabarangayan nga padayonon ang pag-monitor niining mga pabuto nga ibaligya sa ilang barangay.

Hugot nga gidili ang pagbaligya niining mga pabuto sa mga sari-sari stores ug daplin sa karsada tungod kay dinhi sa Cebu City ang gitugotan lang nga sa South Road Properties ra pwedeng makabaligya og pabuto.

Si Tumulak miingon nga paniguraduhon sad nga dunay meeting nga mahitabo tali sa komunidad mahitungod sa kaluwasan niining pagsaulog sa Pasko ug Bag-ong Tuig kay dili mahimong itugyan lang kini  ngadto sa kapulisan, Department of Health ug Bureau of Fire Protection ug uban pa.

Si Tumulak miasoy nga mahimo sab kining kompiskaron ang mga lantaka tungod kay kini ilegal.

Samtang ang pangulo sa mga layko ug kasamtangan nga nagduma sa Love of God Community nga maoy nag-agak sa Surrender to God Program sa Archdiocese of Cebu, Fe Barino niawhag sa mga magtutuo nga dili kalimtan kung nganong anaay Pasko.

Matud pa ni Barino, angay hinumduman sa mga layko nga ang pagsaulog sa Pasko ug Bag-ong Tuig dili lang paglingaw-lingaw sa daghan mga parties ug pagpanghatag og pinaskuhan apan labaw sa tanan mao ang pagpasalamat sa Ginoo sa mga grasya nga nadawat. (BANAT NEWS)