Utok sa pagpangrakrak nailhan

CEBU, Philippines — Gitumbok nga utok sa pagpangrakrak sa Talisay City Jail makaupat ka higayon ang gipasakaan na og kasong attempted murder sa kapulisan sa dakbayan sa Talisay.

Si Supt. Jason Villamater, pangulo sa kapulisan sa Siyudad sa Talisay nibutyag nga ang katapusang suspek sa pagpangrakrak nga nasikop ang nakuhaan nila og affidavit ug nitug-an kini kon si kinsa ang nagsugo kanila.

Siya nagkanayon nga nakahatag kini og affidavit sa wala pa gipatay si Arjian Bacus. Gawas pa ang kauban niini nga si Troy Briones ang nakahatag usab og susamang impormasyon nga nitumbok sa parehong tawo nga maoy nagsugo kanila.

Gipanganlan sa duha ang usa ka “BJ Gaviola”  nga taga Barangay Tanke maoy nagsugo kanila sa pagpangrakrak sa Talisay City Jail bugti sa P10 mil.

Si Bacus ug si Briones ang gipasakaan og kaso nga attempted murder ug gilakip na dinhi sa kaso si Gaviola.

Si Bacus nipiyansa apan gipatay kini human nakagawas. Apan  ang kapolisan nagduda nga ang nagpapatay kaniya mao ang mga tawo nga nagsugo kanila nga rakrakan ang TCJ ug gituohan usab nga nahibaw-an nga nihatag kini og affidavit sa otoridad nga nagtumbok kang Gaviola isip mastermind.

Si Villamater nagtuo nga anaa pa gyuy laing personalidad nga nagsugo ni Gaviola aron suguon usab sila si Bacus ug Briones.

Apan siya nitataw nga ila lang kining mapanganlan kon masikop na sab nila si Gaviola pero labing siguro nga may kalambigitan gihapon kini sa ilegal nga drugas.

Si Gaviola adunay kaso tungod sa ilegal nga drugas apan pabilin pa nga gawasnon karong panahona.

Sumala pa sa kapolisan, ang igsuon ni Gaviola mao si Yamyam Gaviola kinsa nag-atubang og kaso sa ilegal nga drugas ug nakuhaan usab og tablet sa miaging semana atol sa greyhound operation.(Gabriel Bonjoc/IBM)

Panday napasok sa bus patay

Namatay ang usa ka panday nga giingong nagdrayb og motorsiklo nga nakainom ug nabanggaan hinuon sa kasugat nga pasaheroang bus sa National highway, sa Barangay Poblacion, lungsod sa Santander niadtong Domingo sa gabii.

Ang nakalas giila nga si Ronald Bahuyo, 31, ug nagpuyo sa maong dapit. Sigun pa sa imbestigador sa maong kaso nga si SPO1 Leonixto Solon adunay nakasaksi nga samtang nagsubay sa maong dalan ang biktima sakay sa iyang motorsiklo, nagsuray-suray kini.

“Ang driver sa motor hubog. Nagsugod kuno ni og inom pag udto unya nagdrayb og motor pauli na,” matud pa ni Bahuyo.

Sa dihang nakasugat niini ang usa ka bus nga matud pa padulong na mogarahe, wala na madala og lihay sa drayber nga si Nerio Ababa, 38, residente sa Maghaway, Dakbayan sa Talisay.

Kini tungod kay matud pa nakalapas si Bahuyo ngadto sa lane nga gisubay ni Ababa. Nunot niini, matud pa napasok kini sa ilawom sa maong bus ug naguyod kini nga maoy hinungdan sa hinanaling kamatayon.

“Naglisod mi og kuha sa biktima. Mga usa pa ka oras usa pa nakuha ang victim. Gi-jack-an namo,” si Solon miingon. (BANAT NEWS)