Militanteng grupo nabalaka sa kalamboan

CEBU, Philippines — Mga militanteng grupo buot makig-diyalogo sa mga opisyal sa Kapitolyo kabahin sa ilang kabalaka nga maapektohan ang sektor sa mga mag-uuma ug mananagat sa planong kalamboan sa probinsiya sa pagpatukod og mga inprastraktura sa sunod tuig.

Ang maong grupo nagpahigayon og rally atubangan sa Kapitolyo kagahapon diin si KMP chairperson Nick Abasolo mibutyag nga mipadangat sila og suwat niadtong Nobiyembre 23, 2017 ngadto sa buhatan ni Gobernador Hilario Davide, III sa mao nilang tumong apan walay mga opisyal o representante sa Kapitolyo ang miatubang kanila aron mamati sa ilang mga yangungo.

Ang maong kalihukan atol sa ika-69th ka tuig nga anibersaryo sa Pangkalibutanong deklarasyon sa Tawhanon nga katungod.

Lakip sa ilang gireklamo mao ang pagplanong pagpatukod sa  74-kilometers nga expressway diin motadlas kini gikan sa bukirang bahin sa dakbayan sa Naga, lungsod sa Minglanilla, dakbayan sa Talisay ug uban pang parti sa Sugbo ug pagpatukod sa taytayan sa Cordova.

Human sa hamubo nga kalihukan sa Cebu Provincial Capitol gisunod nila ang lihok protesta sa atubangan nga bahin sa Police Regional Office 7 tungod sa ilang pagpangayo og hustisya sa kamatayon ni Elisa Badayos, Eleuterio Moises ug sa tanang biktima sa pagpanglapas sa tawhanong katungod.

Ang maong lihok protesta gitapos sa downtown sa dalan Colon. (BANAT NEWS)