Zero casualty gitinguha atol sa katalagman
CEBU, Philippines — Gitinguha ang zero casualty sa Community Managed- Disaster Risk Reduction (CM-DRR) ubos sa purok system panahon nga dunay moigo nga katalagman sa Sugbo.
Ang hepe sa Provincial Disaster Risk Reduction Management Office Baltazar Tribunalo nagkanayon nga atol sa mga katalagman nga niagi sukad nga na-implementar ang purok system sa mga lungsod sa Liloan, San Francisco, Tabogon ug dakbayan sa Carcar nakab-ot gyud nila ang zero casualty diin walay naangol, namatay ug na-missing nga mga tawo.
Matud usab ni Tribunalo nga usa kini sa pamaagi sa pagpalig-on sa katawhan ilabi na panahon sa emerhensiya atol sa moigong katalagman.
Kabahin sa maong programa mao ang pagpahigayon og mga trainings ug lectures sa mga volunteers nga naggikan sa mga purok diha sa kabarangay sa mga lungsod sa probinsiya.
Lakip usab sa programa ang pag-implementar og mga early warning system (EWS) sa kada purok sama sa pagpabagting sa kampana atol sa emerhensiya.
Gibutyag ni Tribunalo nga sa milabay’ng tulo ka tuig sa pag-implementar nila sa programa nakasinati sila og mga problema sa komunikasyon ug pagkombinse sa katawhan. (BANAT NEWS)
- Latest