Dengvaxia sa Sugbo gi-recall na

CEBU, Philippines — Gisugdan na pag-recall ang liboan ka kontrobersiyal nga dengue vaccines sa Sugbo human gimando sa ulohang buhatan sa Department of Health ang pagpahunong niini.

Si Dr. Jaime Bernadas, regional director sa DOH-7, nitug-an nga ila kining iuli sa ulohan nga buhatan.

Uban niini ang giingong mo-expire na sa sunod tuig hinungdan nga gihunong ang pagpamakuna apan nagpadayon ang mga programa batok sa dengue sama sa paghatag og mga early detection, early consultation ug uban pa.

Gitug-an ni Bernadas nga human nigawas ang pamahayag sa Sanofi nga ang maong vaccine makamugna og grabe nga sakit sa dengue, daghan sa mga lokal nga opisyal ang nangayo og katin-awan sa ilang buhatan.

Tinguha nila karon ang pagbisita sa kalungsuran ug lugar nga nahatagan sa maong bakuna.

Sumala pa ni Bernadas nga nakig-alayon sila sa mga tunghaan sa pag-monitor sa mga bata nga nahatagan sa maong bakuna ug andam sila mohatag og ayuda sa higayon nga adunay masakit niini ug magpatambal sa mga pangpublikong tambalanan.

Gipahibawo ni Bernadas nga wala pa silay nadawat nga imbitasyon gikan sa Kongreso nga patambungon sila sa hearing ilabi na nga usa sa mga pilot area sa bakuna ang Sugbo .

Samtang nagtuo si Gobernador Hilario Davide III nga angay gyud manubag ang DOH sa kontrobersiya.

Ang gobernador nagkanayon nga importante karon ang pag-monitor sa mga bata nga naturokan sa dengue vaccine.

Ang Kapitolyo pinaagi sa Provincial Health Office nagsugod na sa pagkuha sa listahan sa nabakunahan sa Dengvaxia sa Lalawigan sa Sugbo.

Ang PHO nagpatabang sa Provincial Board aron moduso og resolusyon sa pagpadali sa pagpangita sa mga nabakuhanan alang sa ilang himoong monitoring.

Gani si Bokal Victoria Corominas-Toribio nangayo na sa listahan gikan sa DOH sa mga bata nga nabakunahan sa ikatulong distrito sa lalawigan.

“We have to compel the local chief executives nga mandoan ang mga MHOs (municipal health officers) nga ipadala na ilang lista,” matud ni Catan.

Dugang niya nga masuta sa profiling ang history sa nabakunahan kung kini nagka-dengue na ba o wala sa wala pa kini naturokan og anti-dengue vaccine.

Si Daanbantayan Mayor Vicente Loot nagkanayon nga moabot ngadto sa 100 ang nabakunahan sa ilang lungsod nga karon ila gibantayan.

Hinoon sumala pa ni Loot nga sa pagkakaron wala pa silay nadawat nga report nga adunay nasakit og dengue sa mga naturokan sa Dengvaxia. (BANAT NEWS)