Kawani sa Talisay may tag P25 mil
CEBU, Philippines — Mga regular nga kawani sa Talisay City Hall makadawat og tag P25 mil nga kabahin sa ilang Collective Negotiable Agreement (CNA).
Kini human nga nigawas ang memorandum circular nga giluwatan sa Department of Budget nga nagmando nga ipanghatag na kini.
Ang maong kamandoan mohatag sa maong pahalipay sa management ingon man rank and file nga kawani nga malampusong niimplementar sa CNA aron makab-ot ang ubos nga gastuhan ug epektibo nga operasyon sa ilang buhatan.
Ang pundo gikan sa CNA naggikan sa Maintenance and Other Operating Expenses (MOOE). Ihatag kining parehas sa tanang regular nga kawani.
Si Edgar Mabunay, budget officer sa siyudad nagkanayon nga matag opisina nihimo sa cost-cutting. Usa na niini mao ang pagpawong sa suga matag dili kini gamiton aron momenus ang bayranan sa kuryente ingon man sa uban nilang bayrunon.
Niadtong niaging semana, giaprubahan sa konseho ang supplemental budget nga mokantidad P8,428,996 atol sa ilang special session.
Adunay kapin sa 300 ka regular nga kawani ang Talisay City Hall.
Gipadayag ni Mabunay nga ilang paningkamutan nga mahatag na nila kini karong semanaha o ba kaha sa sunod aron magamit sa mga kawani. (BANAT NEWS)
- Latest
