Pasko sa Carcar mabulokon

CEBU, Philippines — Nahimong mabulokon ang pagbukas sa Pasko sa Dakbayan sa Carcar samtang nagpreparar na usab ang Dakbayan sa Mandaue sa pagbukas sa ilang Pasko sa Mandaue karong Disyembre 15.

Gipanindot sa dakbayan sa Carcar ang ilang pagbukas sa kapaskohan pinaagi sa indigay sa Daygon sa Pasko sa dose ka mga tulonghaan ug 14 ka barangay ang niapil sa parol making contest, lakip usab ang pagpasiga sa giant Christmas Tree ug uban mga dekorasyon sa Pasko.

Matud pa ni Mayor Nicepuro Apura, ang paghigugmaay sa diwa sa pasko maoy simbolo sa ilang paghulagway sa mga dayan-dayan nga makita sa gawas sa ilang bag-ong natukod nga city hall.

Sumala pa ni Apura dili mominos sa P2 Milyones ang budget sa ilang tanan dayan-dayan ug nagpasalamat ang mayor sa mga nagtinabangay sa kalampusan niini.

Mga iladong mag-aawit ug kompositor ang nahimong hurado sa daygon contest nga naglangkob nila Russel Alegado, Manolito Languido, Jade Castro ug uban pa.

Nigawas nga mananaug mao ang 2nd Place nga nakabulsa og P10 mil  mao ang Liboron National High School, 1st Place P15 mil mao ang Gelacio Babao Memorial National High School, Grand Champion P20 mil nabulsa sa Carcar Central National High School.

Samtang nasakmit sa Barangay Poblacion 3 ang 2nd Place sa Parol making contest, 1st place Barangay Valladolid ug Champion ang Barangay Valencia.

Sama sa Carcar, indigay gihapon ang himoon sa Mandaue City apan ang ilaha panindotay og floats nga gamitan og mga maanindot nga mga sugang dagitab nga tawgong “Light Festival.”

Si Josephus  Bihag nga maoy officer-in-charge sa matag gabii nga kalihokan nga nahinabi sa mga tigbalita miingon nga ang kagamhanan sa Dakbayan sa Mandaue ang nigahin og P1 ka milyon para niini.

Pagasundan kini og laing kalihokan sa Disyembre 16  nga mao ang indigay sa banda ug mosunod ang “Kantahanay ta sa Mandauehanon” diin pamilya batok pamilya ang magtigi sa pagdaygon. (BANAT NEWS)