Gipatay atol sa birthday sa anak

CEBU, Philippines — Patay ang usa ka 32-anyos nga lalaki nga giingong wanted sa pagpanunggab  ang gipusil patay diha sa sud sa iyang balay sa Barangay Gaway-gaway, Lungsod sa San Remegio.

Ang biktima giila nga si George Mission, residente sa maong lugar.

Sigun pa sa imbestigador sa maong kaso nga si SPO3 Joe Johnnesky Ynot nga adunay warrant of arrest si Mission sa korte tungod sa iyang kaso nga frustrated murder human siya manunggab sa iyang silingan niadtong tuig 2016.

Matud pa nga sukad niadto, nagtago na kini didto sa Dakbayan sa Sugbo.

Apan niadtong Disyembre 8 miuli si Mission sa ilang balay sa barangay aron isaulog ang adlaw’ng natawhan sa iyang anak pagkasunod adlaw niana.

Ang maong imbestigador miasoy nga pagka gabii sa Disyembre 9, adlaw’ng Sabado human sa selebrasyon si Mission na lang ang nahabilin nga nagkanta-kanta sa videoke didto sa ilang sala.

Pagtaud-taud niana nakadungog na lang og sipang buto ang kapuyo niini nga atoa sa ilang kwarto ug sa pagsusi niini, nagbuy-od na si Mission ug may samad pinusilan sa ulo.

“Naigo siya sa ulo unya nilapos sa luyo. Bana-bana namo sa bintana namusil,” si Ynot midugang.

Wala pay matumbok ang kapolisan nga responsable sa krimen apan usa sa ilang gitan-aw ang kalabotan sa kaso niini kaniadto. (BANAT NEWS)