Nakatigbas sa magtiayon nagbasol
CEBU, Philippines — Nagbasol ang usa sa mga suspek sa pagpanigbas sa magtiayon human kini nadakpan sa kapolisan sa Cebu City Police Office (CCPO) ug Talamban Police Station niadtong Biyernes sa hapon.
Matud sa suspek nga si Jen Lou Ardina, 25, nga “sangko sa langit” ang iyang pagbasol human napatay sa pagpanigbas patay sa magtiayon nga sila si Liesyl ug Edwin Bordadora.
Siya nagkanayon nga nahadlok siya dihang apil siya nga gibaharan sa magtiayon kuyog sa laing suspek nga si Jovan Magdadaro nga iyang ig-agaw.
“Sangko sa langit akong pagbasol ma’am, mangayo lang gyud ko og pasaylo sa akong mga ginikanan, unsaon man gyud nada man ta,” sigun pa ni Ardina.
Gihimakak sa suspek nga nakasuyop siya nianang gabhiona sa hitabo apan niangkon nga manuyopay kini sa una ug nahunong na sa niaging tuig.
“Mao gani wala ko nisibat, wa gyud ko magtago-tago, naghuwat ra gyud ko nga naa’y mo-pickup nako,” matud ni Ardina.
Kasamtangang gibalhug si Ardina sa CCPO detention cell samtang ang ig-agaw niini anaa sa Talamban Police Station.
Matud sa kapolisan nga gibuwag ang duha ka dinakpan aron dili magsinumbagay. - /GMR) (BANAT NEWS)
- Latest
