Higanteng Christmas Tree sa Minglanilla siga na

CEBU, Philippines — Gipasiga na ang higanteng Christmas Tree sa Poblacion Plaza, Lungsod sa Minglanilla  kagabii nga gisugdan sa daygon contest ug pagpasiga sa ilang Belen.

Matud ni Konsehal Roy Nacario, chairman sa committee on tourism, nga sa tinguha nga mapatagamtaman nila ngadto sa katawhan ang diwa sa Pasko ilang napabarug ang 60-feet nga Christmas Tree.

Dul-an sa usa ka libo ka eco-brick lanterns gikan sa mga plastic bottles nga gisudlan og basura ang gipahimutang nila sa Christmas Tree.

Dugang ni Nacario nga maoy iyang panglantaw nga kung mapabarug sa ubang kalungsuran ang dako nga Christmas Tree, iya usab kini gitinguha sa ilang lungsod hinungdan nga ila kining gisugdan sa pagtrabaho niadtong hinapos sa Oktubre.

Gitug-an ni Nacario nga adunay mga establisemento, grupo ug mga purok ang niapil sa pag-adorno sa ilang lungsod.

Si Nacario niawhag sa mga Sugbuanon, dili lang taga Minglanilla, nga mobisita sa ilang lugar ug mosaksi sa ilang Christmas Tree. - /GMR) (BANAT NEWS)