Titser nga nanghasi sa nurse posibleng mataktak

CEBU, Philippines — Magtutudlo sa pampublikong tunghaan kinsa nag trending sa social media nga nakig-away sa usa ka nurse sa Cebu Provincial Hospital sa Balamban ang posibleng ma-terminate sa iyang serbisyo human usa ka pormal nga reklamo ang giduso batuk niini sa Department of Education-Cebu Province.

Kung mahinumduman sa nilabay nga bulan, usa ka public school teacher sa Balamban ang giingong nangharas sa usa ka nurse human kini nangangkon wala sila giatiman samtang nagpatambal sa maong tambalanan.

Matud pa ni Atty. Orville dela Cerna, Legal Officer sa DepEd Cebu Province ang magtutudlo mag-atubang og kasong kalapasan sa Republic Act 6173 o Ethical Standards for public officers; violation of DepEd Department Order No.49 series of 2006 or conduct prejudicial to the best interest of service; Violations of Civil Service Rules and the other national laws and misconduct.

Dugang pa ni Dela Cerna, sa pagkakaron ang iyang buhatan nagpaabot na lang sa pagduso sa complainant og dugang mga rekisitos nga ilang gipangayo.

Sumala pa ni Dela Cerna, ubos sa balaod ang reklamante moduso og sworn ug under oath statement ug lakip ang certificate of non-forum shopping aron makapadayon sa ilang imbestigasyon.

Human makaduso ang reklamante sa mga documentary requirements, iduso nila sa respondent ang reklamo aron makahatag kini sa iyang comment under oath sulod sa 72-oras, ug mopadayon gilayon ang preliminary ug formal investigation.

Giklaro ni Dela Cerna, ang ilang opisina igo ra maka rekomendar og posible nga mga silot batok sa gireklamo apan ang direktor sa DepEd-Regional Office VII  maoy disciplining authority sa public school teachers.

Gibutyag ni Dela Cerna, ang penalty mao ang 30 to 6-months suspension o kaha termination sa serbisyo pero magdepende kini sa gibug-aton sa ebidensya nga iduso ug molanat usab ngadto sa 90 ka adlaw ang investigation  basta walay mga kakulian.

Ang gireklamo makahimo usab pagsang-at  og appeal sa desisyon sa rehiyonal nga direktor sa DepEd Central Office, Civil Service Commission, Court of Appeals hangtod sa Supreme Court.

Gitug-an ni Dela Cerna, atol sa ilang panag-estoryahay ni Dr. Rene Catan ang Cebu Provincial Health Officer ang complainant wala mosira sa iyang pultahan alang sa posibleng settlement ngadto sa magtutudlo. - /IBM) (BANAT NEWS)