PRO-7 gustong makabaton og mga body cameras

CEBU, Philippines — Gihangop sa kapulisan sa rehiyon ang paggamit og body camera sa ilang mga operasyon kontra sa ilegal nga drugas bisan pa sa pangangkon sa hepe sa Philippine National Police (PNP) Drug Enforcement Group (DEG) Chief nga wa kini gikinahanglan kay “adunay Ginoo.”

Sigon pa ni Chief Superintendent Jose Mario Espino, director sa Police Regional Office (PRO-7)  nga tinguha niya nga madugangan pa ang mga body cameras.

Una nang namahayag si PNP- DEG Chief Superintendent Joseph Adnol nga ang magsilbi nilang camera mao ang Ginoo.

Apan si Espino nagkanayon mas maayo nang naa niini aron maklaro ug dili mapasanginlan ang mga polis nga nangabuso sa pagpatuman nila sa balaod ug aron usab pagpamatuod nga wala malambigit sa extra-judicial killings ang mga polis.

“Body cameras will help in the conduct of operation,” sigon pa ni Espino.

Ang unang nakabaton og  ingon niini nga gadget mao ang Cebu City Police Office nga gidonar sa usa ka pribadong kompanya nga nag-develop niini.

Si Espino midugang nga kinahanglan sila nga naa niini aron madugang sa ebidensya pagmatuod nga limpyo ang matag operasyon.

Magsilbi pud kini nga depensa sa kapulisan kon pananglitan pasanginlan silang gibutang-butangan lang ang mga mapatay sa operasyon nga maoy pirmeng pasangil sa mga human rights groups.

Samtang gipasalig ni Espino nga higpitan nila ang proseso pagpili og mga operatiba nga maglangkob unya sa gibanhaw nga drug enforcement unit.

Sa laing bahin, ang Philippine Drug Enforcement Agency-7 director Emerson Margate nagtuo nga lisod na nga mopayuhot o ginadiling druga diri sa Sugbo karon nga aduna na silay mga in-house personnel sa ports.

“One of the main sources of illegal drugs is through the ports na pumapasok sa bansa, naglagay ng office na duon kasama ng Customs,” sigon pa ni Margate.

Midugang si Margate nga ang pagdungag og operatiba sa PDEA ngadto sa mga pantalan posibleng makatabang pagpakunhod sa pagsud-gawas sa supply sa drugas dinhi sa Sugbo.

Si Margate miingon nga sa pagkakaron nisaka og maayo ang presyo sa shabu kay nahimo na kini karon nga P40 mil matag bulto. Kini tungod sa pagkunhod sa supply niini gumikan sa gipakusgang operasyon. - /IBM) (BANAT NEWS)