P50mil kada ulo sa kriminal?

CEBU, Philippines — Mga polis nga makapatay og kriminal hatagan ni Cebu City Mayor Tomas Osmeña og P50,000 isip legal assistance sa mga polis sa siyudad.

Matud ni Osmeña nga dili kini reward apan kwarta kini para tabang sa mga polis kay basin magka-problema kon makapusil ug dili na hinuon mamahimong epektibo sa ilang trabaho.

“But if they kill criminals in the line of duty, they will receive at least P50,000 as legal assistance,” matud ni Osmeña sa pakighinabi sa Banat News. Kuhaon ang budget gikan sa discretionary fund sa mayor. Karong tuiga, dunay P7.4 million nga discretionary fund ang mayor. Sunod tuig, aduna siyay P7.8 million.

“I’m not sure if we can reduce drugs next year without reinforcing our efforts. Drugs are flowing in from China and we are not able to stop the inflow,” sigon niya.

Mao kini ang statement sa mayor human mi anunsyo si President Rodrigo Duterte nga nabalik na ang Philippine National Police sa kampanya batok ilegal nga drugas sa nasud.

“We have to fight it as it spills out in our streets, block by block, house to house if need be. I’m not Team Rama. They can cry over drug protectors like Imok (slain Ermita barangay captain Felicisimo Rupinta) but not me,” matud ni Osmeña.

Sa laing bahin, si kanhi mayor Michael Rama miingon nga tun-an sa Barug Team Rama ang pagpasaka og kaso batok ni Osmeña kinsa sige’g pangdaot sa patay na nga si Rupinta. Si Osmeña miingon nga ang legal assistance mahatag lang sa kapolisan nga na-assign sa Cebu City.

“I’m mayor only in Cebu city. I will not interfere with other LGUs. We will, however, try to assist families of slain soldiers. Like those soldiers who died in Bohol and Marawi,” sigon niya.

Kahinumduman nga nanghatag sab si Osmeña og P50,000 isip reward sa mga polis nga makapatay og drug personalities sa miaging tuig.  Nagtuo ang mayor nga makatabang ang kwarta sa pagkuha og abogado alang sa mga polis nga makapatay “in the line of duty.”

Apan gihunong sa mayor ang paghatag sa kwarta niadtong Agosto 2016 human gipangrelibohan ang mga gihulagway sa mayor nga iyang mga “trusted men.”

Sa pagkakaron, maayo na ang relasyon sa mayor ug ni Cebu City Police Office Director Joel Doria kinsa iyang gisigehan og dayeg  tungod sa palahi apan epektibo niining pamaagi pagdala sa kapolisan sa siyudad. —  /IBM) (BANAT NEWS)