Pabuto idili sa Mandaue
CEBU, Philippines — Gitinguha ni Mandaue City Mayor Gabriel Luis “Luigi” Quisumbing nga hingpit na unyang idili ang pagpabuto atol sa pagsugat sa Pasko ug Bag-ong Tuig pinaagi sa pagpagawas og executive order.
Tuig 2009 pa gipanday ang ordinansa alang sa pagdili sa pagpamaligya og mga pabuto sa dakbayan human sa nahitabong pagbuto sa firecracker zone nga nikalas og tulo ka kinabuhi ug niangol pa og pipila.
Sunod semana gitug-an sa mayor nga hingpit na gyud idili ang paggamit og pabuto pinaagi sa executive order.
Tugutan ang mga pyrotechnic apan kinahanglan nga mokuha og permit sa City Hall ang mga tawo nga mopahigayon og fireworks display
Niadto lang nilabay nga Enero tulo ka barangay ang nakasinati og sunog atol sa pagsugat sa Bag-ong Tuig diin liboan ka pamilya ang nawagtangan og panimalay.
Ang EO nga luwatan sa mayor pagpalig-on kini sa EO 28 nga giluwatan ni Presidente Rodrigo Duterte.
Samtang sa lain bahin dako sab ang pasalamat ni Quisumbing sa Rotary Club of Cebu West human sa pagdonar niini og mga fire safety equipment sa kagamhanan sa dakbayan.
Nakadawat ang kagamhanan og 20 ka sets sa fire retardant clothing ug unom ka self-contain breathing apparatus.
Ang maong mga ekipo giapod-apod ngadto sa mga barangay sama sa Banilad, Cubacub, Tipolo ug Paknaan, diin aktibo ang fire volunteer brigade.
Si Kapitan Malaquias Soco sa Barangay Paknaan mapasalamaton tungod kay duha lang ka sunog ang ilang nasinati karong tuiga.
Gitug-an ni Soco nga sukad tuig 2013 hangtud karon aduna silay dul-an sa 200 ka fire volunteers sa ilang barangay. (BANAT NEWS)
- Latest
