Banat ( Leaderboard Top ), pagematch: 1, sectionmatch: 1

3rd Panaghiusa Festival gipahigayon

CEBU, Philippines — Gipahigayon sa Department of Social Welfare and Development-7 ang ikatulong tuig sa Panaghiusa Festival diin usa sa ilang gipangusgan ang pagkaylap sa mga impormasyon sa mga gipang-andam nga programa ug serbisyo sa ahensiya.

Ang programa gisugdan niadtong Miyerkules sa Ayala Center Cebu pinaagi sa ribbon cutting nga gipangulohan nilang DSWD-7 Director Ma. Evelyn Macapobre, Grace Q. Subong, Social Welfare Officer V; ug si Hermimia Cabahu, Assistant Regional Director for Administration.

Ang kalihukan nga matapos karong adlawa naglambigit og mga programa nga nipakita og mga positibong epekto sa kinabuhi sa mga benepisyaryo.

"For this year we will invite partner- beneficiaries in order to share their inspiring stories and how they were able to rise above the challenges they face in their day to day life," matud pa ni Macapobre.

Nakita ni Macapobre nga ang presensya sa mga beneficiaries maghatag og inspirasyon sa katawhan nga dili dayon moundang sa pagkab-ot sa damgo sa kinabuhi.

Lakip sa mga kalihukan ang Sustainable Livelihood Program (SLP) job fair, festival parade, information caravan, state of the region address ug paghatag og ganti sa mga mananaug sa 2017 Regional Search for Huwarang Pantawid Pamilya, Exemplary Pantawid Pamilya Children ug Kalahi CIDSS Bayani Ka.

Aduna say mga trade exhibit nga nagpakita sa mga produkto ubos sa SLP gikan sa Bohol, Sugbo, Negros Oriental ug Siquijor.

Dugang ni Macapobre nga giila usab ang mga kontribusyon sa mga nagkalain-laing stakeholders ug mga nasudnong ahensiya sa gobiyerno.

Karong adlawa ipadangat ni Macapobre ang iyang State of the Region Address. (BANAT NEWS)

  • Follow Us: