Junjun Osmeña nihural na

CEBU, Philippines — Opisyal na nga nilingkod isip konsehal sa Siyudad sa Sugbo si Renato “Junjun” Osmeña kinsa sakop sa Barug Team Rama human siya gitudlo ni Presidente Rodrigo Duterte hulip kang kanhi konsehal Nendell Hanz Abella.

Si Osmeña nihural atubangan ni Associate Justice Gabriel Ingles sa Court of Appeals kagahapon sa hapon.

Si Osmeña gi-endorso sa Barug Team Rama nga mohulip kang Abella human gitudlo ni Duterte isip Commissioner sa Seventh Division sa National Labor Relations Commission (NLRC).

Niadtong Septiyembre, si kanhi Bise Presidente Jejomar Binay, chairman sa United Nationalist Alliance nga kaalyado sa Barug Team Rama, nipirma sa certification nag-nominate kang Osmeña.

Buot ni Osmeña nga mangulo sa committee on peace and order ug transportation kun mahatagan og oportunidad.

“Because that’s the committee that people hate to do and no one wants to accept on how difficult it is.

I want that challenge; you know I am the person that sees something, that’s why I am here right now. I have to do something, dili ko sige yaw-yaw wala tay mahimo ana. I am here to come up with the solution,” matud ni Osmeña.

Samtang sila si Konsehal Raymond Garcia ug Joel Garganera niingon nga dili una mohimo og reorganization sa konseho ug huwaton na lang ang regular reorganization karong Hulyo sunod tuig.

Ang konseho karon nagtabla diin walo sa Barug Team Rama ug walo sa BOPK nga kaalyado ni Mayor Tomas Osmeña, nga uyoan ni Junjun.

Matud sa mayor nga andam siya makigtrabaho sa konseho sanglit dili siya gusto nga sagulan og pamolitika tungod kay makaapektar kini sa paghatag og serbisyo sa katawhan. (BANAT NEWS)