Kauban sa grupo sa pagpanulis nasikop
CEBU, Philippines — Gidudahang tulisan nasikop sa may Alumnus, Basak-San Nicolas, Dakbayan sa Sugbo kagabii.
Ang nasikop mao si Larry Tabar, 29, walay trabaho ug residente sa maong lugar.
Matud ni Senior Police Officer 1 Racquel Camay, desk officer sa Mambaling Police Station, nga nakadawat sila og tawag nga adunay lalaki nga naghupot og armas hinungdan nga girespondehan sa ilang team.
Atol sa pagresponde giingong adunay gilabay si Tabar dayon sibat ug sa dihang gisusi sa mga operatiba nakit-an ang .38 paltik revolver nga dunay bala hinungdan nga gipahigayon ang hot pursuit operation ug nasikop si Tabar sa ilang panimalay.
Gitug-an ni Camay nga nasikop na kanhi si Tabar gumikan sa kaso sa ilegal nga drugas.
Modus sa dinakpan ug mga higala niini nga nasikop na sab sa nilabay nga semana mao ang paggamit sa ilang mga amiga nga babaye sa pag-chat og mga lalaki dayon tagbuon kini sa mga amiga nila aron makig-inom.
Dihang mahubog na ang mga biktima didto kini nila panulison ug kulatahon hinungdan nga nanawagan karon ang Mambaling Police Station sa mga biktima sa tulis sa pagpatim-aw sa ilang buhatan ug ilhon ang dinakpan.
Kasamtangang nagtingkagol sa lock-up jail ang dinakpan samtang giandam ang pagsang-at og tukmang kaso batok niini. (BANAT NEWS)
- Latest
