Mga nabakunahan angay magpalista

CEBU, Philippines — Gipanawagan sa Provincial Health Office (PHO) ang mga ginikanan kansang mga anak naturokan og Dengvaxia vaccine nga magpalista sa ilang municipal ug city health offices aron maapil sila sa surveillance ug monitoring nga himoon sa PHO.

Si Dr. Rene Catan pangulo sa PHO miingon nga mas dali nilang matutokan ang matag usa sa mga batang nabakunahan. Base sa record sa DOH-7, 159, 355 ang nabakunahan sa probinsya sa Sugbo.

Hatagan og kopya sa listahan ang tanang tambalanan sa probinsya sa Sugbo dili lang sa mga public hospitals apil na usab sa mga pribadong tambalanan.

“So kani sila nga list among plano is buhatan siya og data base aron ang mga bata kung pananglitan, ma-track namo kung asa sila ma-admit in relation to dengue and also not in relation to dengue. Kasi wala ta kahibalo kung ang complication ana niya naa bay bag-o nga mogawas complication out of sa vaccination, kinahanglan ma pick up na namo,” matud ni Catan.

Si Catan makigtagbo sa mga municipal health offices ug city health offices lakip na Mandaue, Lapu-Lapu ug Dakbayan sa Sugbo alang sa “comprehensive and cohesive approach” sa problema.

Gibutyag ni Catan nakamugna og panic sa mga tawo kining kontrobersiya sa anti-dengue vaccine. Si Catan miawhag nga unta suportahan sila imbes nga sawayon tungod sa isyu human nga makadawat ang buhatan sa DOH og nagkalain-laing mga pagsaway.

"This is a problem of the community. Kinahanglan nga magtinabangay kita," dugang ni Catan.

Ang kagamhanan sa Dakbayan sa Mandaue nipadala og suwat ngadto sa DOH-7 aron magpakisayod kung unsay protocol nga sundon kon adunay mga bata nga gibakunahan sa Dengvaxia ang magkasakit.

Nasayran nga sa Mandaue City, adunay 6 mil ka mga bata ang nabakunahan. (BANAT NEWS)